اسلام آباد۔2اپریل (اے پی پی):وزیرِ اعظم محمد شہباز شریف نے آئندہ پانچ سالوں میں ملکی برآمدات دو گُنا کرنے کیلئے لائحہ عمل بنانے ، ای کامرس شعبے میں برآمد کنندگان کو سہولیات فراہم کرنے اور وزارت تجارت کو ’’میڈ ان پاکستان‘‘برانڈ برآمد کرنے والوں کے مسائل کے فوری حل کرنے کی ہدایت کی ہے۔منگل کو وزیراعظم آفس کے میڈیا ونگ سے جاری بیان کے مطابق وزیرِ اعظم محمد شہباز شریف کی زیرِ صدارت برآمدی شعبے کی ترقی پر اعلیٰ سطح کا اجلاس منعقد ہوا۔ اجلاس میں وفاقی وزراء جام کمال خان، رانا تنویر حسین، ای-کامرس شعبے کے نامور برآمد کنندہ انٹرپرینیور ز بشمول یوٹوپیا کے چیف ایگزیکٹو آفیسر جبران نیاز، ذیشان شاہ، سلمان احمد اور متعلقہ اعلیٰ حکام نے شرکت کی۔اجلاس کو پاکستان میں برآمدی شعبے کی ترقی کیلئے تجاویز پیش کی گئیں۔ وزیرِ اعظم کو برآمدی شعبے کی سہولت کیلئے سفارشات اور برآمدات کو فروغ دینے کیلئے لائحہ عمل پر بھی بریفنگ دی گئی۔ وزیرِ اعظم نے وزارت تجارت کو تمام سٹیک ہولڈرز اور انٹرپرینیورز سے مشاورت کے بعد ملکی برآمدات کو آئندہ پانچ برس میں دوگُنا کرنے کے حوالے سے لائحہ عمل مرتب کرکے پیش کرنے کی ہدایت کی۔وزیرِ اعظم نے ای کامرس شعبے میں برآمد کنندگان کو سہولیات فراہم کرنے اور وزارت تجارت کو ’’میڈ ان پاکستان ‘‘ برانڈ برآمد کرنے والوں کے مسائل کے فوری حل کی بھی ہدایت کی۔ وزیراعظم نے کہا کہ پاکستان کے برآمدی شعبے کی مکمل استعداد سے بھرپور فائدہ اٹھانے کیلئے اقدامات کر رہے ہیں۔ انہوں نے ہدایت کی کہ آئی ٹی، گھریلو استعمال کی مصنوعات، ٹیکسٹائل اور منفرد شعبوں کی برآمدات کے فروغ کیلئے شعبے کے سٹیک ہولڈرز کو اعتماد میں لیا جائے۔ وزیراعظم نے ہدایت کی کہ ایسی برآمدات جو عالمی ویلیو چینز کا حصہ ہوں ان کی صنعت کی ترقی کی حوصلہ افزائی کیلئے سفارشات مرتب کرکے پیش کی جائیں۔