کراچی۔ 15 اپریل (اے پی پی):گورنر سندھ کامران ٹیسوری کی زیر صدارت صوبہ کی تباہ حال صنعتوں کی بحالی، صنعتی انقلاب کے سلسلہ میں اہم اجلاس منعقد ہوا۔ پیر کو جاری اعلامیہ کے مطابق اجلاس میں صوبہ کے اہم بینکرز، تاجروں، صنعتکاروں نے خصوصی شرکت کی ۔
گورنرسندھ نے کہا کہ صوبہ میں صنعتی انقلاب برپا کرنا اگلا ہدف ہے، صوبہ میں صنعتوں کی بحالی اور صنعتی انقلاب کے لئے ٹاسک فورس بنائیں گے۔ انہوں نے مزید کہا کہ روزگار کے بڑے مواقع پیدا کرنے والے صنعتکاروں کو ہر سہولت دیں گے۔ انہوں نے کہا کہ آئی ٹی کورسز سے نوجوانوں کو آراستہ کیا،اب نوکریاں دینگے۔ انہوں نے کہا کہ سندھ میں ایس آئی ایف سی کے تحت بڑے منصوبے شروع ہوں گے،صوبہ میں ہر طبقے کے افراد کو روزگار ملے گا۔انہوں نے کہا کہ سندھ سے صنعتیں اب دیگر صوبوں یا ملکوں میں نہیں جائیں گی،ایسا انقلاب لائیں گے کہ دیگر صوبوں،ملکوں سے صنعتکار سندھ آئیں گے۔ انہوں نے کہا کہ اب تک جو وعدہ کیا، اللہ کے کرم سے پورا کرکے دکھایا،سندھ کے تمام تاجروں اور صنعتکاروں کو اعتماد میں لوں گا، تاجروں اور صنعتکاروں سے مل کر صنعتی انقلاب لائیں گے، تاجروں اور صنعتکاروں کے تمام مسائل وفاق سے حل کروائیں گے۔