راولپنڈی: بانی پی ٹی آئی نے سانحہ 9 مئی کی تحقیقات کے سلسلے میں پولی گرافک سمیت 3 ٹیسٹ کرانے سے انکار کر دیا۔
سانحہ 9 مئی کی تحقیقات کے سلسلے میں بانی پی ٹی آئی سے لاہور پولیس کی تفتیش کا پہلا مرحلہ مکمل ہوگیا۔ تفتیش کے دوران بانی پی ٹی آئی نے پنجاب فرانزک سائنس کے ماہرین کو 3 ٹیسٹ دینے سے انکار کر دیا۔
بانی پی ٹی آئی کے پولی گرافک ٹیسٹ کے لیے لاہور پولیس اڈیالہ جیل پہنچی۔ پولیس کی تفتیشی ٹیم کے ساتھ پنجاب فرانزک سائنس کے ماہرین بھی تھے۔ ڈی ایس پی جاوید کی سربراہی میں انسپکٹر رانا اکمل، رانا ارحم، عالم لنگڑیال، رانا منیر، محمد علی پر مشتمل لاہور پولیس ٹیم جیل کے اندر روانہ ہوئی۔ ان کے ساتھ پنجاب فرانزک سائنس ایجنسی (پی ایف ایس اے) کے عابد ایوب، انسپکٹر وقاص خالد تھے۔
پی ایف ایس اے ماہرین نے بانی چیئرمین کا جھوٹ پکڑنے والا پولی گراف ٹیسٹ، وائس میچنگ، فوٹو گرامیٹری کرنا تھا۔ لاہور پولیس ٹیم نے بانی چیئرمین سے 9 مئی واقعات سے متعلق مختلف سوالات بھی کرنے تھے۔ تاہم تفتیش کے دوران پولیس نے بانی پی ٹی آئی سے مختلف سوالات کیے تو بانی چیئرمین نے سوالات کے جواب دینے سے انکار کرتے ہوئے کہا کہ مجھے پولیس پر اعتبار نہیں۔
یہ بھی پڑھیں: پی ٹی آئی کی پنجاب سے خواتین کی مخصوص نشستوں کی فہرست تیار
تفتیشی ٹیم کے سربراہ ڈی ایس پی جاوید آصف نے کہا کہ آپ پولیس کے تفتیشی افسران سے تعاون کریں ہم آپ کے ساتھ انصاف کریں گے۔ ڈی ایس پی جاوید آصف کی جانب سے انصاف کی یقین دہانی پر بانی چیئرمین پی ٹی آئی نے 15 منٹ تک پولیس کے سوالات کے جوابات دیئے۔ تاہم تفتیش کے دوران بانی چیئرمین نے پنجاب فرانزک سائنس کے ماہرین کو 3 ٹیسٹ دینے سے انکار کردیا۔
انہوں نے پی ایف ایس اے کی ٹیم کو کہا کہ میں بہت سے تفتیشی اداروں کے زیر تفتیش ہوں۔ فی الحال کوئی ٹیسٹ نہیں کراؤں گا۔ مختلف ٹیسٹ کرنے کے حوالے سے بعد میں پولیس کو وقت دوں گا۔
تفتیش کا پہلا مرحلہ مکمل ہونے پر لاہور پولیس ٹیم اڈیالہ جیل سے روانہ ہو گئی۔
واضح رہے کہ گزشتہ روز بانی چیئرمین نے تفتیشی ٹیم سے تعاون سے انکار کر دیا تھا۔