پنجاب کی وزیراطلاعات عظمیٰ بخاری نے کہا ہے کہ اڈیالہ جیل کے قیدی کا مشن دھرنوں کے ذریعے ہی اقتدار تک پہنچنا ہے۔
وزیراطلاعات پنجاب عظمیٰ بخاری نے کہا کہ پنجاب میں دفعہ 144 دہشتگردی کے پیش نظر لگائی گئی ہے، جو بھی قانون کی خلاف ورزی کرے گا اس سے سختی سے نمٹا جائے گا۔
ان کا کہنا تھا کہ احتجاج اور دھرنے کے نام پر شہریوں کی زندگی اجیرن بنانے کی اجازت نہیں دی جائے گی۔ جو جماعت 2014 سے سڑکوں پر ہے وہ 3 دن گھر میں آرام کرلے۔ اڈیالہ جیل کے قیدی کا مشن دھرنوں کے ذریعے اقتدار تک پہنچنا ہے تاہم اب پہلے جیسی سہولت کاری دستیاب نہیں اور نہ ہی دھرنے کے فنانسر میسر ہیں۔
اسلام آباد میں سیاسی جماعتوں کا دھرنا و احتجاج، ٹریفک پولیس نے متبادل روٹ پلان جاری کر دیا
عظمیٰ بخاری نے کہا کہ پی ٹی آئی کی سیاسی تاریخ سڑکوں اور چوک چوراہوں کے گرد ہی گھومتی ہے۔ انتشار، افراتفری اور ہیجان کی کیفیت پیدا کرنا ہی دھرنا پارٹی کا ایجنڈا ہے۔ آپ لوگوں کو اڑھائی گھنٹے والی بھوک ہڑتال ہی سوٹ کرتی ہے۔
صوبائی وزیراطلاعات نے مزید کہا کہ دھرنا پارٹی کے پاس احتجاج اور دھرنے کے لیے خیبرپختونخوا موجود ہے، مریم نواز پنجاب کے عوام کو سستی روٹی، سستا آٹا اور مفت ادویات دے رہی ہیں جبکہ خیبرپختونخوا کے عوام 11 سال سے انقلابی تقریریں اور ریاست مخالف پروپیگنڈے سے پیٹ بھر رہے ہیں۔