تحریک انصاف کے بانی عمران خان کے وکیل انتظار پنجوتھا کا بازیابی کے بعد ویڈیو بیان سامنے آیا ہے جس میں انہوں نے بتایا ہے کہ انہیں دو کروڑ روپے تاوان کی غرض سے اغوا کیا گیا تھا۔
پنجاب پولیس نے گذشتہ روز سنیچر کو تحریک انصاف کے بانی کے ’لاپتہ‘ وکیل انتظار پنجوتھا کو حسن ابدال کے قریب سے بازیاب کرانے کا دعویٰ کیا تھا۔
مقامی میڈیا نے ترجمان پولیس کے حوالے سے بتایا تھا کہ ’اٹک پولیس نے حسن ابدال میں ناکہ بندی پر مشکوک گاڑی کو روکا تو گاڑی میں سوار مبینہ اغوا کاروں نے پولیس پر اندھا دھند فائرنگ شروع کر دی۔‘
ترجمان نے بتایا’ گاڑی میں اغوا کار ایک شخص کو اغوا کر کے لے جا رہے تھے، پولیس کی جوابی فائرنگ پر وہ مغوی اور گاڑی چھوڑ کر فرار ہوگئے۔‘
انتظار پنجوتھا نے اپنے اغوا سے متعلق ابتدائی بیان میں بتایا ہے کہ انہیں 8 اکتوبر کو اسلام آباد سے ’اُٹھایا گیا اور تشدد کا نشانہ بنایا گیا۔‘
بانی پی ٹی آئی کے وکیل نے مزید کہا کہ ’اغواکار تین چار گھنٹے سے سفر کرارہے تھے، کہاں سے یہاں تک لائے علم نہیں۔‘
واضح رہے کہ پاکستان تحریک انصاف کے بانی عمران خان کے وکیل انتظار پنجوتھا 8 اکتوبر سے لاپتہ تھے، ان کی بازیابی کیلئے کیس بھی اسلام آباد ہائیکورٹ میں زیر سماعت تھا۔