پاکستان سمیت دنیا بھر میں واٹس ایپ، فیس بک اور انسٹاگرام کی خدمات اچانک متاثر ہو گئیں، جس سے صارفین کو پیغامات بھیجنے، کال کرنے اور لاگ اِن رہنے میں شدید مشکلات کا سامنا کرنا پڑا۔ سوشل میڈیا کا منظرنامہ یکسر بدل گیا جب صارفین نے اپنی شکایات مائیکروبلاگنگ ویب سائٹ "ایکس" پر شیئر کرنا شروع کر دیں۔
صارفین کا کہنا ہے کہ میٹا کی ایپس جیسے واٹس ایپ، انسٹاگرام اور فیس بک پر نہ صرف میسجز رُک گئے بلکہ آڈیو اور ویڈیو کالز بھی معطل ہو گئیں۔ کچھ نے یہ بھی شکایت کی کہ ان کے فیس بک اکاؤنٹس خود بخود لاگ آؤٹ ہو رہے ہیں۔
میٹا نے اپنے ایکس اکاؤنٹ پر وضاحت دی کہ ایک تکنیکی خرابی کی وجہ سے ایپس کی سروس متاثر ہوئی ہے، اور ان کی ٹیم مسئلہ حل کرنے میں مصروف ہے۔ انہوں نے صارفین کو درپیش مشکلات پر معذرت بھی کی۔