جنرل عاصم منیر نے وزیراعلی خیبرپختونخوا علی امین گنڈا پور اور صوبے کی مختلف سیاسی جماعتوں سے تعلق رکھنے والے سیاستدانوں سے الگ الگ بات چیت کی۔آئی ایس پی آر کے مطابق ملاقات میں ’شرکا نے دہشت گردی کی لعنت کے خلاف ایک سیاسی آواز اور عوامی حمایت کی ضرورت پر اتفاق رائے کیا۔ سیاسی نمائندوں نے دہشت گردی کے خلاف لڑائی میں مسلح افواج اور ایل ای اے کی غیر متزلزل حمایت کی، اور دہشت گرد گروپوں کے انتہا پسندانہ فلسفے کے خلاف سیاسی رنگوں سے بالاتر ہو کر ایک متحد محاذ کی ضرورت پر اتفاق کیا۔‘’دہشت گردی کے خلاف جنگ جاری ہے، اسے منطقی انجام تک پہنچائیں گے‘چیف آف آرمی سٹاف جنرل عاصم منیر نے آج پشاور کا دورہ کیا جہاں انہیں سکیورٹی کی موجودہ صورتحال اور شدت پسندوں کو نشانہ بنانے کے لیے جاری انسداد دہشت گردی آپریشنز کے بارے میں جامع بریفنگ دی گئی۔آئی ایس پی آر کے مطابق بریفنگ میں وفاقی وزیر داخلہ اور وزیراعلیٰ خیبرپختونخوا نے بھی شرکت کی۔چیف آف آرمی سٹاف نے کہا کہ ’ہم برائی کی قوتوں کے خلاف متحد ہیں، مجھے اپنی سکیورٹی فورسز کی شاندار کامیابیوں پر بے حد فخر ہے۔ ان کی لگن، حوصلے اور عظیم قربانیوں کے ذریعے ہم نے اپنی سرحدوں کے اندر اور اس سے باہر دہشت گرد تنظیموں کی آپریشنل صلاحیتوں کو کامیابی سے کم کر دیا ہے۔‘’ہماری افواج نے انتھک محنت سے دہشت گردوں کے اہم لیڈروں کا تعاقب کیا اور انہیں ختم کیا، ان کے بنیادی ڈھانچے کو ختم کیا اور ان کے ٹھکانوں کو بے اثر کر دیا، جس سے یہ واضح پیغام گیا کہ دہشت گردی کی ہماری سرزمین پر کوئی جگہ نہیں ہے۔ یہ جنگ جاری ہے اور ہم اسے منطقی انجام تک پہنچائیں گے۔‘