سندھ کاؤنٹر ٹیررازم ڈپارٹمنٹ (CTD) نے خفیہ اطلاع پر کارروائی کرتے ہوئے حب ریور روڈ کے علاقے آسکانی محلہ تھانہ موچکو کی حدود میں فتنہ الخوارج کے دہشت گردوں کے خفیہ ٹھکانے پر چھاپہ مارا۔
کارروائی کےدوران دہشت گردوں نے فائرنگ کردی جس کے جواب میں دوطرفہ فائرنگ کا شدید تبادلہ ہوا۔ ترجمان سی ٹی ڈی کے مطابق مقابلے کے دوران فتنہ الخوارج کے دو دہشت گرد جہنم واصل ہوگئے، خفیہ ذرائع سے اطلاع ملی تھی کہ مذکورہ مقام پر دہشت گرد ممکنہ تخریبی کارروائی کی منصوبہ بندی کررہے ہیں۔
مقابلے کے بعد علاقے میں بم ڈسپوزل اسکواڈ کو طلب کرلیا گیا۔ جائے وقوعہ سے خودکش جیکٹ، ایک کلاشنکوف، ایک پسٹل اور بڑی مقدار میں بارودی مواد برآمد کیا گیا ہے۔
سی ٹی ڈی کے مطابق دہشت گرد کسی بڑے حملے کی منصوبہ بندی کررہے تھے جسے بروقت ناکام بنادیا گیا۔ آپریشن میں حصہ لینے والے اہلکاروں نے کارروائی مکمل ہونے کے بعد پورے علاقے کو گھیرے میں لے کر سرچ آپریشن شروع کیا جبکہ سی ٹی ڈی اور پولیس کی مزید نفری بھی طلب کرلی گئی تاکہ ممکنہ طور پر چھپے ہوئے دیگر عناصر کو گرفتار کیا جاسکے۔