وزیراعلیٰ خیبرپختونخوا سردار علی امین گنڈاپور نے احساس فلیگ شپ انیشیٹو کے تحت جاری پروگراموں کے لیے فنڈز بڑھا کر 8 ارب روپے کرنے کا اعلان کیا ہے۔ ان پروگرامز میں احساس نوجوان، احساس ہنر، احساس روزگار اور احساس اپنا گھر شامل ہیں۔
وزیر اعلی خیبرپختونخوا علی امین گنڈاپور کی زیر صدارت احساس فلیگ شپ انیشیٹو سے متعلق اجلاس منعقد ہوا، جس کے تحت مختلف فلاحی پروگراموں پر اب تک کی پیشرفت کا جائزہ لیا گیا، ان پروگراموں میں احساس نوجوان، احساس ہنر، احساس روزگار اور احساس اپنا گھر پروگرام شامل ہیں۔
اجلاس میں وزیراعلیٰ خیبرپختونخوا کی جانب سے احساس پروگرام فنڈز بڑھا کر 8ارب روپے کرنے کا اعلان کیا گیا جبکہ ہر پروگرام کے تحت رواں سال بلاسود قرضوں کی فراہمی پر دو ارب روپے خرچ کیے جائیں گے۔
وزیر اعلیٰ نے ضم اضلاع کے عوام کے لیے احسن اقدام اٹھایا، ان چاروں پروگراموں میں ضم اضلاع کے لیے علیحدہ اور مخصوص پورشن رکھنے کا فیصلہ کیا گیا ہے۔علی امین گنڈاپور کی جانب سے فیصلہ کیا گیا کہ ضم اضلاع کے پروگراموں کے لیے فنڈز بھی علیحدہ مختص کیے جائیں گے، اس کے ساتھ ہی ہدایت کی گئی کہ ان پروگراموں کے تحت قرضوں کے حصول کے سلسلے میں ضم اضلاع کے لیے طریقہ کار اور لوازمات کو بھی آسان کیا جائے۔
وزیراعلیٰ علی امین گنڈاپور نے کہا کہ ضم اضلاع کے عوام خصوصی توجہ کے مستحق ہیں، کوشش کی جائے کہ رواں سال ضم اضلاع سے زیادہ سے زیادہ لوگ ان سکیموں سے مستفید ہوں، اس موقع پر انہوں نے احساس پروگرامز کے تحت قرضوں کی تقسیم کا عمل تیز کرنے کی ہدایت بھی کی۔انہوں نے ہدایت کی کہ اس مقصد کے لیے درخواست گزاروں کی سلیکشن کا کرائٹیریا مزید آسان کیا جائے، اجلاس کو احساس پروگراموں کے تحت اب تک کی پیش رفت پر تفصیلی بریفنگ دی گئی، انہیں بتایا گیا کہ احساس نوجوان پروگرام کے کمپونینٹ ون کے تحت بینک آف خیبرکے ذریعے عمل درآمد جاری ہے۔
اجلاس میں بریفنگ دیتے ہوئے بتایا گیا کہ احساس پروگرام کے کمپونینٹ ون کے تحت 139 درخواست گزاروں میں 408 ملین روپے کے قرضے تقسیم کیے گئے ہیں، کمپونینٹ ون کے تحت منظور شدہ مزید 52 درخواست گزاروں کے لیے 116 ملین روپے درکار ہیں جبکہ احساس نوجوان پروگرام کے کمپونینٹ ٹو پر اخوت مائکرو فنانس کے ذریعے عمل درآمد جاری ہے۔
بریفنگ دیتے ہوئے وزیراعلیٰ کو بتایا گیا کہ اخوت کمپونینٹ کے تحت مختص شدہ فنڈز سو فیصد تقسیم کیے جا چکے ہیں، اب تک 3585 درخواست گزاروں میں 602 ملین روپے کے بلاسود قرضے تقسیم کیے گئے ہیں، اخوت کمپونینٹ کے تحت مزید 1745 کیسز پراسیس میں ہیں، اس اخوت پروگرام کے تحت قرضوں کی ریکوری کی شرح بھی سو فیصد ہے۔
اجلاس میں بتایا گیا کہ احساس ہنر پروگرام کے تحت مزید 592 کیسز پراسیس میں ہیں، احساس اپنا گھرا سکیم کے تحت قرعہ اندازی کے ذریعے 76 کامیاب درخواست گزاروں میں 200 ملین روپے تقسیم کیے گئے ہیں، اسکیم کے تحت رواں مالی سال قرضوں کی فراہمی کے لیے کرائٹیریا مزید ریلیکس کردیا گیا ہے، اس اسکیم کے تحت اہلیت کے لیے آمدنی کی حد ایک لاکھ سے بڑھا کر ڈیڑھ لاکھ روپے ماہانہ کر دی گئی ہے۔