سٹی پولیس کراچی نے تین روز قبل نوجوان عادل کے قتل میں ملوث دو ملزمان اویس اور زوہیب کو گرفتار کر لیا ہے۔
پولیس کے مطابق مقتول عادل اور ملزم اویس کے درمیان سابقہ رنجش چلی آ رہی تھی کیونکہ دونوں ایک ساتھ کام کرتے تھے۔ اویس نے اپنے ماموں زکریہ کے ساتھ مل کر برگر کے ٹھیلے پر فائرنگ کرکے عادل کو قتل کیا۔ واقعے میں ملوث دیگر دو ملزمان تاحال مفرور ہیں جن کی گرفتاری کے لیے چھاپے جاری ہیں۔
ایس ایس پی سٹی عارف عزیز نے مزید بتایا کہ گارڈن پولیس چوکی کے قریب نوجوان عبداللہ کے قتل کیس میں بھی پیش رفت ہوئی ہے۔ مقتول عبداللہ کا اپنے چچا ذوالفقار سے گھریلو تنازع چل رہا تھا۔ ملزم ذوالفقار عبداللہ کو بہانے سے باہر لے گیا اور ٹریفک پولیس چوکی کے قریب گولی مار کر قتل کر دیا۔
پولیس کے مطابق ذوالفقار محکمہ پولیس میں تعینات ہے اور قتل میں استعمال ہونے والا سرکاری اسلحہ اس کے قبضے سے برآمد کر لیا گیا ہے۔