خیبرپختونخوا : ایپکس کمیٹی کا اجلاس، دہشت گردی کیخلاف آپریشن جاری رکھنے پر اتفاق

image

وزیراعلیٰ خیبر پختونخوا علی امین گنڈا پور کی زیر صدارت صوبائی ایپکس کمیٹی کا اجلاس ہوا، اجلاس میں دہشت گردی کے خلاف آپریشن جاری رکھنے پر اتفاق کیا گیا۔

اجلاس میں مشیر اطلاعات، کمانڈر پشاور، چیف سیکریٹری اور آئی جی کے پی کے علاہ اعلیٰ سول و عسکری حکام نے شرکت کی۔ اجلاس میں خصوصی دعوت پر ضلع باجوڑ، خیبر اور شمالی وزیرستان سے تعلق رکھنے والے ممبران قومی و صوبائی اسمبلی بھی شریک ہوئے۔

اجلاس میں صوبے خصوصاً ضم اضلاع میں امن کی صورتحال کا تفصیلی جائزہ لیا گیا جبکہ متعلقہ حکام کی جانب سے اجلاس کو موجودہ سکیورٹی چیلنجز کے مختلف پہلوئوں پر بریفنگ دی گئی۔ اجلاس میں دہشت گردی کے واقعات میں شہید ہونے والے سویلینز، پولیس اور سکیورٹی اہلکاروں کو خراج عقیدت پیش کرتے ہوئے دہشت گردی کے خلاف مل جل کر کوششیں جاری رکھنے کے عزم کا اظہار کیا گیا۔

اس موقع پر دہشت گردی کے خاتمے کے لیے کارروائیوں میں بھرپور عوامی اعتماد حاصل کرنے کے لیے اقدامات پر بھی اتفاق کیا گیا۔ ایپکس کمیٹی کے اجلاس میں دہشت گردوں کے خلاف موثر کارروائیوں کے لیے سول انتظامیہ، پولیس، سکیورٹی فورسز اور انٹیلی جنس اداروں کے درمیان کوآرڈینیشن کو بہتر بنانے پر زور دیا گیا۔

اس موقع پر اظہار خیال کرتے ہوئے وزیراعلیٰ نے کہا کہ دہشت گردی ایک ناسور بن چکا ہے جس کے مستقل بنیادوں پر خاتمے کے لیے حکومت، عوام اور اداروں کو مل کام کرنا ہوگا۔ انہوں نے کہا کہ دہشت گرد سب کے مشترکہ دشمن ہیں اور سب دہشت گردی کا خاتمہ چاہتے ہیں۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US