حکومت سندھ نے پولیس کی تفتیشی صلاحیت کو مزید مؤثر بنانے کے لیے بڑا قدم اٹھا لیا۔ چیف سیکریٹری سندھ آصف حیدر شاہ کی زیر صدارت اہم اجلاس میں فیصلہ کیا گیا کہ سندھ پولیس میں 2 ہزار اے ایس آئی انویسٹیگیشن بھرتی کیے جائیں گے۔
اجلاس میں آئی جی سندھ غلام نبی میمن، ایڈیشنل چیف سیکریٹری داخلہ محمد اقبال میمن، سیکریٹری سروسز سمیت دیگر افسران شریک ہوئے۔
چیف سیکریٹری آصف حیدر شاہ نے کہا کہ پولیس میں تفتیشی نظام کو جدید اور مؤثر بنانا وقت کی اہم ضرورت ہے بہتر تفتیشی ڈھانچے سے عوام کا اعتماد بحال ہوگا اور شہریوں کو فوری انصاف کی فراہمی ممکن ہو سکے گی۔ انہوں نے واضح کیا کہ بھرتی کے عمل میں تمام رکاوٹیں ختم کی جائیں گی۔
آئی جی سندھ غلام نبی میمن نے اجلاس میں کہا کہ اے ایس آئی انویسٹیگیشن کی بھرتی سے پولیس کی کارکردگی میں نمایاں بہتری آئے گی تحقیقاتی عمل مضبوط ہوگا اور جرائم پیشہ عناصر کی گرفت ممکن ہوگی۔