پاکستان کے نائب وزیر خارجہ اسحاق ڈار کے دورۂ بنگلہ دیش کے دوران دونوں ممالک کے درمیان چھ معاہدوں اور مفاہمتی یادداشتوں پر دستخط ہو گئے ہیں۔
پاکستان نے بنگلہ دیشی طلباء کو آئندہ پانچ برسوں کے دوران پاکستان میں اعلیٰ تعلیم حاصل کرنے کے لیے 500 سکالرشپس دینے کا اعلان کیا ہے۔
وزارت خارجہ کے مطابق پاکستان اور بنگلہ دیش کے درمیان معاہدوں پر دستخط کی تقریب اتوار کو ڈھاکہ میں منعقد ہوئی جس میں نائب وزیراعظم و وزیر خارجہ اسحاق ڈار اور بنگلا دیش کے مشیر برائے خارجہ امور محمد توحید حسین بھی شریک ہوئے۔
پاکستان کے نائب وزیراعظم اسحاق ڈار نے اپنے دورۂ بنگلہ دیش کے مشیر خارجہ سے ملاقات کی جس میں باہمی تعلقات مزید مضبوط بنانے کے عزم کا اعادہ کیا گیا۔
وزارت خارجہ کی جانب سے جاری بیان کے مطابق وزیر خارجہ اسحاق ڈار کی قیادت میں پاکستانی وفد کے اتوار کو بنگلہ دیش کے مشیر برائے خارجہ امور محمد توحید حسین کی قیادت میں بنگلہ دیشی وفد سے مذاکرات ہوئے۔
مذاکرات میں تجارتی و معاشی تعاون، عوامی روابط، ثقافتی تبادلے، تعلیم اور استعداد کار میں تعاون اور انسانی ہمدردی کے معاملات پر تبادلۂ خیال کیا گیا۔
بیان میں کہا گیا ہے کہ ’اس دوران علاقائی و عالمی امور پر بھی گفتگو ہوئی جن میں سارک کی بحالی، فلسطین کے مسئلے اور روہنگیا بحران کے حل پر بات چیت شامل تھی۔‘
وزارت خارجہ نے مذاکرات کو ’تعمیری‘ قرار دیتے ہوئے کہا کہ یہ دونوں ممالک کے درمیان موجود خیر سگالی اور دوستانہ تعلقات کی عکاسی کرتے ہیں۔ دونوں فریقین نے دوطرفہ تعلقات کو مزید مستحکم بنانے کے لیے مل کر کام کرنے پر اتفاق کیا۔‘
پاکستان اور بنگلہ دیش کے درمیان کن معاہدوں پر دستخط ہوئے؟
دونوں ممالک کے درمیان سفارتی اور سرکاری پاسپورٹ رکھنے والے شہریوں کے لیے ویزا ختم کرنے اور تجارتی امور پر مشترکہ ورکنگ گروپ کے قیام کے معاہدوں پر دستخط ہوئے۔
اس کے علاوہ فارن سروس اکیڈمی آف پاکستان اور فارن سروس اکیڈمی آف بنگلہ دیش کے درمیان باہمی تعاون جبکہ دونوں ممالک کی خبر رساں ایجنسیوں ایسوسی ایٹڈ پریس آف پاکستان اور بنگلہ دیش سنگباد سانگستھا کے درمیان تعاون بڑھانے کے لیے مفاہمتی یادداشت پر بھی دستخط ہوئے۔
Following delegation level talks in Dhaka today, the DPM/FM @MIshaqDar50 and Foreign Adviser of Bangladesh oversaw signing of six instruments between Pakistan and Bangladesh. Their list includes Agreement between Pakistan and Bangladesh on Visa Abolition for Diplomatic and… pic.twitter.com/jFzKj00s6G
— Ministry of Foreign Affairs - Pakistan (@ForeignOfficePk) August 24, 2025
دونوں ممالک کے تحقیقی ادارے انسٹی ٹیوٹ آف اسٹریٹجک سٹڈیز اسلام آباد اور بنگلہ دیش انسٹی ٹیوٹ آف انٹرنیشنل اینڈ سٹریٹجک سٹڈیز کے درمیان باہمی تعاون کے حوالے سے مفاہمتی یادداشت پر دستخط کیے گئے۔
پاکستان اور بنگلہ دیش کے درمیان کلچرل ایکسچینج پروگرام 2025-2028 بھی شروع کرنے سے متعلق معاہدہ بھی طے پایا۔
اس سے قبل نائب وزیراعظم اسحاق ڈار اور وزیر تجارت جام کمال نے اتوار کو بنگلہ دیش کے مشیر تجارت شیخ بشیر الدین اور سرکاری اداروں کے دیگر اعلیٰ حکام سے ملاقات کی۔
وزارت خارجہ نے بتایا کہ اس ملاقات میں ’دو طرفہ تجارت، سرمایہ کاری اور اقتصادی تعاون پر تفصیلی بات چیت ہوئی۔‘
وزارت خارجہ کے مطابق پاکستان کو ’پاکستان بنگلہ دیش نالج کوریڈور‘ کے آغاز پر خوشی ہے۔ اس منصوبے میں بنگلہ دیشی طلباء کو آئندہ پانچ برسوں کے دوران پاکستان میں اعلیٰ تعلیم حاصل کرنے کے لیے 500 وظائف دیے جائیں گے۔
ان سکالرشپس میں ایک چوتھائی میڈیکل کے شعبے کے لیے مختص ہوں گی۔ مزید برآں، 100 بنگلہ دیشی سول سرونٹس کو پاکستان میں تربیت دی جائے گی، جبکہ ’پاکستان ٹیکنیکل اسسٹنس پروگرام‘ کے تحت وظائف کی تعداد بھی 5 سے بڑھا کر 25 کر دی گئی ہے۔