بانی تحریک انصاف عمران خان کے مطالعے کے لیے کتابیں اڈیالہ جیل پہنچا دی گئیں۔ بانی پی ٹی آئی کی کُتب بیرسٹر سلمان صفدر نے جیل انتظامیہ کے حوالے کیں۔
واضح رہے کہ بانی پی ٹی آئی کو کتابوں کی عدم فراہمی اور بچوں سے بات نہ کروانے سے متعلق کیس کی سماعت انسداد دہشت گردی عدالت راولپنڈی میں ہوئی تھی۔عدالت نے حکم دیا تھا کہ بانی پی ٹی آئی کو کتابیں فراہم کی جائیں اور بچوں سے بات کروائی جائے۔
دوسری جانب عمران خان اور بشریٰ بی بی کے خلاف توشہ خانہ ٹو کیس کی گزشتہ سماعت کا تحریری حکم نامہ بھی جاری کر دیا گیا ہے۔ اسپیشل جج سینٹرل شاہ رخ ارجمند نے اپنے حکم نامے میں کہا ہے کہ جن وکلا کے وکالت نامے جمع ہیں سپرنٹنڈنٹ جیل انہیں داخلے کی اجازت دیں جبکہ سماعت کے وقت جیل کے باہر موجود فیملی ممبرز کو بھی آنے کی اجازت دی جائے۔
واضح رہے کہ بیرسٹر سلمان نے وکلا اور اہل خانہ کو روکنے کے خلاف درخواست دائر کی تھی جسے عدالت نے نمٹا دیا ہے۔