پی ڈی ایم اے نے آگاہ کیا ہے کہ پنجاب میں بارشوں کا نواں سلسلہ 29 اگست سے 2 ستمبر تک جاری رہے گا اور اس دوران مختلف اضلاع میں شدید طوفانی بارشوں کا امکان ہے۔
ترجمان پی ڈی ایم اے کے مطابق راولپنڈی، مری گلیات، اٹک، چکوال، جہلم، گوجرانوالہ، لاہور، گجرات اور سیالکوٹ میں بارشیں متوقع ہیں جبکہ ڈیرہ غازی خان، ملتان اور راجن پور میں بھی موسلا دھار بارشوں کا امکان ہے۔اس تناظر میں صوبے کے کمشنرز اور ڈپٹی کمشنرز کو ہدایت کی ہے کہ وہ الرٹ رہیں۔
وزیراعلیٰ پنجاب مریم نواز کی ہدایت پر ضلعی انتظامیہ کو بھی ہائی الرٹ کر دیا گیا ہے۔ حکام کے مطابق مون سون بارشوں کے نتیجے میں دریائے چناب، راوی اور ستلج میں انتہائی اونچے درجے کا سیلاب ہے۔
حالیہ صورتحال کے پیش نظر تمام ڈپٹی کمشنرز سمیت محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کو بھی الرٹ رہنے کی ہدایات جاری کر دی گئی ہیں۔
اس کے ساتھ شہریوں سے اپیل کی گئی ہے کہ خراب موسم میں احتیاطی تدابیر اختیار کریں اور دریاؤں کے کنارے سیر و تفریح سے گریز کریں اور غیر ضروری سفر نہ کریں۔مزید کہا گیا کہ ایمرجنسی کی صورتحال میں شہری پی ڈی ایم اے ہیلپ لائن 1129 پر فوری رابطہ کریں۔