صوبائی مشیر برائے ویمن ڈیولپمنٹ ڈیپارٹمنٹ ڈاکٹر ربابہ خان بلیدی نے کہا ہے کہ ملک کے بیشتر دریاؤں میں سیلابی صورتحال تشویشناک حد تک سنگین ہوچکی ہے، ایسے میں بلوچستان کے دریائے سندھ سے منسلک کینالز اور سرحدی علاقوں کو کسی صورت نظر انداز نہیں کیا جاسکتا۔
انہوں نے کہا کہ حالیہ اطلاعات کے مطابق ممکنہ سیلابی صورتحال کے خدشات بڑھ رہے ہیں جس کے پیش نظر حکومت بلوچستان نے ہنگامی بنیادوں پر اقدامات شروع کردیے ہیں، ڈاکٹر ربابہ خان بلیدی نے کہا کہ بلوچستان حکومت دریائی صورتحال پر گہری نظر رکھے ہوئے ہے اور اس سلسلے میں سندھ اور پنجاب حکومتوں سے مسلسل رابطے میں ہے تاکہ آنے والی کسی بھی ہنگامی صورتحال کا بروقت مقابلہ کیا جاسکے۔
انہوں نے واضح کیا کہ عوام الناس کو بھی چاہیے کہ وہ پیشگی احتیاطی تدابیر اختیار کریں خاص طور پر دریاؤں اور نہروں کے قریب آباد افراد اپنے تحفظ کے لیے محتاط رہیں اور مقامی انتظامیہ کی ہدایات پر عمل کریں، انہوں نے کہا کہ حکومت بلوچستان نے ضلعی انتظامیہ کو ہدایت جاری کردی ہے کہ وہ ممکنہ خطرے سے دوچار علاقوں میں حفاظتی اقدامات یقینی بنائیں اور ہنگامی بنیادوں پر ریلیف پلان تیار رکھیں۔
متعلقہ محکموں کو ہدایت کی گئی ہے کہ وہ مشینری، ریسکیو ٹیمیں اور طبی سہولیات ہائی الرٹ پر رکھیں، صوبائی مشیر نے کہا کہ بلوچستان کے عوام کو یقین دلایا جاتا ہے کہ حکومت اپنے شہریوں کے تحفظ اور سلامتی کو اولین ترجیح دے رہی ہے اور ہر ممکنہ صورتحال کا مقابلہ کرنے کے لیے بھرپور تیاری کی جارہی ہے تاہم عوامی تعاون کے بغیر کسی بھی قدرتی آفت کا سامنا ممکن نہیں، اس لیے شہریوں کو چاہیے کہ وہ حکومت اور اداروں کے ساتھ بھرپور تعاون کریں۔