جاپان کے جنوب مغربی علاقوں کو سمندری طوفان پیپاہ نے تباہی مچا دی جس کے نتیجے میں متعدد حادثات پیش آئے اور درجنوں افراد زخمی ہو گئے۔
مقامی میڈیا کے مطابق طوفان سب سے پہلے کوچی سے ٹکرایا جس کے بعد شدید بارشیں اور تیز ہوائیں شروع ہو گئیں۔ طوفان کے باعث شیزوکا میں مکانات کی چھتیں اُڑ گئیں اور کئی گاڑیاں اُلٹ گئیں جبکہ مختلف حادثات میں 24 افراد زخمی اور 220 عمارتیں متاثر ہوئیں۔
رپورٹس کے مطابق طوفان پیپاہ اب دارالحکومت ٹوکیو کی طرف بڑھ رہا ہے۔ حکام نے ملک بھر میں ہائی الرٹ جاری کرتے ہوئے عوام کو غیر ضروری سفر سے گریز اور گھروں میں رہنے کی ہدایت کی ہے۔
علاوہ ازیں واکایاما میں بھی طوفان کے باعث شدید بارشیں شروع ہو گئی ہیں جس سے سیلاب اور لینڈ سلائیڈنگ کا خدشہ بھی پیدا ہو گیا ہے۔طوفان کی شدت کے باعث ریسکیو اور ایمرجنسی سروسز کو الرٹ رکھا گیا ہے تاکہ کسی بھی ہنگامی صورتحال میں فوری مدد فراہم کی جا سکے۔