پشاور میں پاکستان تحریکِ انصاف کے جلسے کے تناظر میں وفاقی دارالحکومت اسلام آباد میں سیکیورٹی ہائی الرٹ کر دی گئی ہے۔
ترجمان اسلام آباد پولیس کے مطابق امن و امان کی صورتحال برقرار رکھنے کے لیے حساس مقامات پر نفری میں اضافہ کر دیا گیا ہے جبکہ مارگلہ کٹی پہاڑی، سنگجانی اور مارگلہ روڈ کے قریب خصوصی سیکیورٹی تعینات کر دی گئی ہے۔
پولیس حکام نے بتایا کہ کسی بھی ناخوشگوار واقعے سے نمٹنے کے لیے گشت کو مزید سخت کر دیا گیا ہے اور شہر کے داخلی و خارجی راستوں پر ناکہ بندی کے ذریعے چیکنگ کو مزید مؤثر بنایا گیا ہے۔
شہریوں کو ہدایت کی گئی ہے کہ وہ سیکیورٹی اداروں کے ساتھ مکمل تعاون کریں اور کسی بھی مشکوک شخص یا سرگرمی کی فوری اطلاع پولیس ہیلپ لائن پر فراہم کریں۔
پولیس ترجمان نے واضح کیا کہ عوام کے تحفظ کو اولین ترجیح دی جا رہی ہے اور شہر میں مکمل طور پر امن و امان قائم رکھنے کے لیے تمام وسائل بروئے کار لائے جا رہے ہیں۔