خیبر پختونخوا کابینہ کے دو وزراء نے اپنے عہدوں سے استعفیٰ دے دیا ہے۔ مستعفی ہونے والوں میں صوبائی وزیر تعلیم فیصل خان ترکئی اور صوبائی وزیر آبپاشی عاقب اللہ خان شامل ہیں۔
ذرائع کے مطابق دونوں وزراء کے استعفے کی وجہ گزشتہ روز پشاور میں ہونے والے پی ٹی آئی کے جلسے میں سامنے آئی، جہاں انہیں اسٹیج پر تقریر کا موقع نہ مل سکا۔ بتایا گیا ہے کہ عاطف خان گروپ کے رہنماؤں کو بھی خطاب کا موقع نہ دینے پر کئی رہنما احتجاجاً جلسہ گاہ سے چلے گئے تھے بعد ازاں انہیں منا کر واپس لایا گیا مگر پھر بھی تقریر نہ کرنے دی گئی۔
سیاسی مبصرین کے مطابق صوبائی کابینہ میں اختلافات پہلے سے موجود تھے تاہم دو وزراء کے استعفیٰ کے بعد یہ اختلافات کھل کر سامنے آگئے ہیں۔