سندھ اسمبلی کی پبلک اکاؤنٹس کمیٹی میں آڈٹ ریکارڈ فراہم نہ کرنے پر محکمہ بلدیات کی لوکل کونسلز کے 14 افسران کو معطل کردیا گیا۔
پبلک اکاؤنٹس کمیٹی کے احکامات کی روشنی میں محکمہ بلدیات نے صوبائی وزیر کی منظوری سے مختلف لوکل کونسلز کے 14 افسران کو معطل کرکے شوکاز نوٹس اجرا کا نوٹیفیکیشن جاری کردیا۔
پی اے سی کو آڈٹ ریکارڈ جمع نہ کرانے پر معطل ہونے والوں میں میونسپل کارپوریشن میرپورخاص کے میونسپل کمشنر انیس الرحمان سیال، ٹاؤن میونسپل کمشنر میرپورخاص ممتاز علی چنہ، میونسپل کمیٹی مٹھی کے چیف میونسپل آفسر سعید احمد بروہی شامل ہیں۔
معطل ہونے والے لوکل کونسل کے دیگر افسران میں ٹیکسکشن افسر جھڈو عزت حسین منگی، ٹاؤن کمیٹی اسلام کوٹ اور چیلھار کے ٹاؤن افسر امتیاز علی راھپوٹو، ٹاؤن کمیٹی کھوسکی کے ٹاؤن افسر ذوالفقار علی کیھر شامل ہیں۔
معطل ہونے والوں میں ٹاؤن افسر کاشف تھہیم، ٹاؤن افسر ثناء اللہ ابڑو، ٹاؤن افسر دلاور منگریو، ٹاؤن افسر زاھد علی ناریجو شامل ہیں۔
لوکل کونسلز کے معطل افسران میں ٹاؤن افسر شمشیر علی شاہ، ٹاؤن افسر پرویز علی بھٹو، ٹاؤن افسر عامر علی سومرو اور ٹاؤن افسر فرحان علی لغاری شامل ہیں۔
غفلت کا مظاہرہ کرنے پر معطل 14 افسران کو شوکاز نوٹس بھی جاری کیے گئے ہیں۔
چیئرمین پی اے سی نثار کھوڑو کا کہنا ہے کہ آڈٹ ریکارڈ فراہم نہ کرنا غفلت کے زمرے میں آتا ہے۔ جو افسران آڈٹ پیراز کے متعلق آڈٹ ریکارڈ فراہم نہیں کریں گے ان کے خلاف کارروائی کی جائے گی۔