اسلام آباد: وفاقی دارالحکومت میں حالات معمول پر آگئے ہیں۔ ضلعی انتظامیہ کے مطابق شہر میں امن و امان کی صورتحال مکمل طور پر قابو میں ہے، جبکہ کاروباری، تعلیمی اور سماجی سرگرمیاں بغیر کسی رکاوٹ کے جاری ہیں۔

ضلعی انتظامیہ نے اسلام آباد کے مختلف علاقوں کی تازہ فوٹیجز اور تصاویر جاری کیں، جن میں دیکھا جا سکتا ہے کہ شہر کی تمام شاہراہوں پر ٹریفک معمول کے مطابق رواں دواں ہے، مارکیٹیں کھلی ہیں اور شہری اپنی روزمرہ سرگرمیوں میں مصروف ہیں۔

کاروباری اور تعلیمی سرگرمیاں بحال

انتظامیہ کے مطابق اسلام آباد کے تمام کاروباری مراکز، مارکیٹیں، دفاتر اور تعلیمی اداروں میں معمول کے مطابق سرگرمیاں جاری ہیں۔ ضلعی ترجمان نے بتایا کہ کسی بھی علاقے میں کسی قسم کی بندش یا سیکیورٹی الرٹ کی اطلاع نہیں، شہری بلا خوف و خطر اپنے معمولات انجام دے رہے ہیں۔

ٹریفک اور نقل و حمل کی صورتحال

ضلعی انتظامیہ کے مطابق شہر کی تمام مرکزی شاہراہیں — اسلام آباد ایکسپریس وے، کشمیر ہائی وے، فیصل ایونیو، مری روڈ اور زیرو پوائنٹ انٹرچینج مکمل طور پر ٹریفک کے لیے کھلی ہیں۔ انتظامیہ نے شہریوں سے اپیل کی ہے کہ افواہوں پر یقین نہ کریں اور صرف سرکاری ذرائع سے معلومات حاصل کریں۔

دفعہ 144 کا نفاذ برقرار

ضلعی انتظامیہ نے واضح کیا ہے کہ وفاقی دارالحکومت میں دفعہ 144 نافذ ہے۔ اس قانون کے تحت کسی بھی قسم کے احتجاج، جلسے یا جلوس کی اجازت نہیں دی جائے گی۔ ترجمان کے مطابق کسی بھی غیر قانونی سرگرمی یا اجتماع کے انعقاد پر قانون فوراً حرکت میں آئے گا۔

عوام کے لیے ہدایت

انتظامیہ نے شہریوں سے کہا ہے کہ وہ قانون نافذ کرنے والے اداروں سے مکمل تعاون کریں اور اگر کسی بھی غیر معمولی صورتحال یا مشتبہ سرگرمی کی اطلاع ہو تو فوراً ضلعی کنٹرول روم یا قریبی تھانے کو اطلاع دیں۔