صدر مملکت آصف علی زرداری اور وزیراعظم محمد شہباز شریف نے یومِ استحصالِ کشمیر کے موقع پر کشمیری عوام کے ساتھ مکمل یکجہتی کا اظہار کرتے ہوئے ان کے حقِ خودارادیت کی حمایت جاری رکھنے کے عزم کا اعادہ کیا ہے۔
صدر آصف علی زرداری نے اپنے پیغام میں کہا کہ جنوبی ایشیا میں پائیدار امن کا قیام مسئلۂ کشمیر کے منصفانہ اور پرامن حل سے وابستہ ہے۔ انہوں نے عالمی برادری پر زور دیا کہ وہ مقبوضہ جموں و کشمیر میں انسانی حقوق کی مبینہ خلاف ورزیوں کا نوٹس لے اور اس مسئلے کے حل کے لیے مؤثر کردار ادا کرے۔ صدر مملکت کا کہنا تھا کہ بھارت کے یکطرفہ اور غیر قانونی اقدامات مقبوضہ کشمیر کی متنازع حیثیت کو تبدیل نہیں کر سکتے جبکہ پاکستان کشمیری عوام کی سفارتی، سیاسی اور اخلاقی حمایت جاری رکھے گا۔
وزیراعظم محمد شہباز شریف نے اپنے پیغام میں کہا کہ 5 اگست 2019 کے بھارتی اقدامات کے بعد مقبوضہ جموں و کشمیر میں ریاستی جبر میں اضافہ ہوا تاہم تمام مشکلات کے باوجود کشمیری عوام نے ثابت قدمی اور حوصلے کی نئی مثال قائم کی ہے۔
انہوں نے کہا کہ جموں و کشمیر کا تنازع جنوبی ایشیا میں امن و استحکام کے لیے سب سے اہم اور دیرینہ حل طلب مسئلہ ہے جس کا پائیدار اور منصفانہ حل ہی خطے میں امن کی ضمانت بن سکتا ہے۔ وزیراعظم نے عالمی برادری سے مطالبہ کیا کہ وہ صرف تشویش کے اظہار تک محدود نہ رہے بلکہ تنازع کشمیر کے منصفانہ اور دیرپا حل کے لیے عملی اور ذمہ دارانہ کردار ادا کرے۔
وزیراعظم نے اس عزم کا بھی اعادہ کیا کہ پاکستان کشمیری عوام کی سفارتی، سیاسی اور اخلاقی حمایت ہر سطح پر جاری رکھے گا اور ان کے حقِ خودارادیت کے حصول کی جدوجہد میں ان کے ساتھ کھڑا رہے گا۔