وزیراعظم محمد شہباز شریف نے پاکستان اور جنوبی افریقا کی کرکٹ ٹیموں کے اعزاز میں خصوصی عشائیہ دیا جس میں دونوں ٹیموں کے کھلاڑیوں سے ملاقات اور خوشگوار گفتگو ہوئی۔
وزیراعظم نے جنوبی افریقا کی ٹیم کو پاکستان آمد پر خوش آمدید کہا اور اس موقع پر دونوں ممالک کے درمیان شاندار تعلقات اور کھیلوں کے ذریعے مضبوط ہوتے تعلقات پر زور دیا۔ انہوں نے کہا کہ جاری کرکٹ سیریز دونوں ملکوں کے درمیان کھیلوں کے گہرے تعلقات اور باہمی احترام کی عکاس ہے۔
شہباز شریف نے کرکٹ کو صرف کھیل نہیں بلکہ مختلف ممالک کے عوام کو قریب لانے کا ذریعہ قرار دیا اور کہا کہ اس کھیل کی اصل روح بھائی چارے اور امن کو فروغ دینا ہے۔ انہوں نے پاکستان کرکٹ ٹیم کے لیے نیک خواہشات کا اظہار کیا اور امید ظاہر کی کہ ٹیم ماضی کی طرح شاندار کھیل کا مظاہرہ کرے گی۔
عشائیے میں جنوبی افریقا کی ٹیم کے کھلاڑیوں اور انتظامیہ نے پاکستان کی حکومت اور عوام کی گرمجوشی پر شکریہ ادا کیا اور کہا کہ پاکستان میں سیریز ایک یادگار تجربہ رہی۔
اس موقع پر وفاقی وزراء، چیئرمین پاکستان کرکٹ بورڈ محسن نقوی اور پاکستان کرکٹ بورڈ کے اعلیٰ عہدیدار بھی موجود تھے۔