صوبہ پنجاب کے پولیس سربراہ عثمان انور نے کہا ہے کہ بسنت نہیں ہو رہی اور پتنگ بازی کے خلاف عمومی طور پر کارروائی کی گئی ہے۔جمعے کو لاہور میں سپیشل سیکریٹری داخلہ فضل الرحمٰن اور سی سی ڈی کے ایڈیشنل آئی جی سہیل ظفر چٹھہ کے ہمراہ پریس کانفرنس میں ان کا کہنا تھا کہ صوبائی بارڈر چیک پوسٹوں پر اسلحے کی سمگلنگ روکنے کے لیے سکینر نصب کیے جا رہے ہیں۔’صوبہ میں ’پنجاب سرنڈر آف اللیگل آرمز ایکٹ 2025‘ متعارف کروایا جا رہا ہے اور غیرقانونی اسلحہ 15 دن کے اندر جمع کروانا لازم ہو گا۔‘آئی جی پنجاب کا کہنا تھا کہ لائسنس یافتہ اسلحہ کی مکمل جانچ پڑتال کی جائے گی، 10 لاکھ سے زائد لائسنس یافتہ اسلحے کی ازسرِ نو جانچ پڑتال کی جائے گی۔خیال رہے کہ گزشتہ ہفتے صوبائی حکومت نے اگلے سال فروری میں بسنت منانے کی تیاریوں کے لیے مختلف کمیٹیاں تشکیل دی تھیں۔اردو نیوز کو دستیاب سرکاری دستاویزات کے مطابق پنجاب کی سینیئر وزیر مریم اورنگ زیب کی زیرِصدارت ایک اعلٰی سطح کے اجلاس میں فروری میں بسنت منانے کی تیاریوں کے لیے کام کمیٹیوں کے سپرد کیے گئے۔ اس اجلاس میں ڈپٹی کمشنر لاہور کی تیار کردہ تفصیلی پریزینٹیشن نے اس عمل کو تاریخی اور انتظامی دونوں زاویوں سے اجلاس کے سامنے رکھا۔بسنت کو بہار کے موسم کے استقبال کی خوشی کی علامت کے طور پر منایا جاتا رہا ہے، اور پنجاب حکومت نے لاہور میں ’محفوظ حدود‘ میں اس تہوار کو دوبارہ منانے کی تیاریوں میں تھی لیکن رواں ہفتے دہاتی ڈور سے ایک نوجوان کی موت کے بعد ایک بار پھر یہ منصوبہ تعطل کا شکار ہو گیا ہے۔
بسنت کو بہار کے موسم کے استقبال کی خوشی کی علامت کے طور پر منایا جاتا رہا ہے۔ فائل فوٹو: اے ایف پی
پنجاب پولیس کی جانب سے بدھ کو جاری کیے گئے بیان کے مطابق تھانہ نواں کوٹ کے علاقے میں مبینہ طور پر ڈور پھرنے سے شہری نعمان جان سے چلا گیا۔
بیان کے مطابق آئی جی پنجاب نے ڈی آئی جی آپریشنز لاہور کو پتنگ بازی میں ملوث ملزمان کی فوری گرفتاری کا حکم دیا اور ساتھ میں اینٹی کائٹ فلائنگ ایکٹ کی خلاف ورزی پر زیرو ٹالرنس، پتنگ بازی ممانعت ترمیمی بل کے قانون پر سختی سے عملدرآمد یقینی بنانے کی ہدایت کی۔