حکومت سندھ نے گاڑیوں اور موٹر سائیکلوں کی نمبر پلیٹس کو نئی اجرک تھیم والی سیکیورٹی فیچرڈ پلیٹس سے تبدیل کرنے کی مدت میں مزید دو ماہ کا اضافہ کر دیا ہے۔
محکمہ ایکسائز، ٹیکسیشن و نارکوٹکس کنٹرول سندھ کی جانب سے جاری نوٹیفکیشن کے مطابق نئی نمبر پلیٹس حاصل کرنے کی آخری تاریخ اب 31 دسمبر 2025 مقرر کر دی گئی ہے۔ قبل ازیں یہ ڈیڈ لائن 31 اکتوبر 2025 تھی۔
محکمہ ایکسائز کے مطابق صوبے بھر میں تقریباً 65 لاکھ موٹر سائیکلیں رجسٹرڈ ہیں جن میں سے صرف کراچی میں یہ تعداد 33 لاکھ سے تجاوز کر چکی ہے۔ حکام کا کہنا ہے کہ بڑی تعداد میں شہری اپنی موٹر سائیکلیں اوپن لیٹر پر استعمال کر رہے ہیں جو کہ قانوناً جرم ہے۔
واضح رہے کہ حکومت سندھ نے اگست میں پاکستان پیپلز پارٹی کے چیئرمین بلاول بھٹو زرداری کی ہدایت پر اجرک ڈیزائن والی نئی نمبر پلیٹس کی ڈیڈ لائن 31 اکتوبر تک بڑھائی تھی جس میں اب ایک بار پھر توسیع کی گئی ہے۔