پاکستان نے افغان طالبان کے ترجمان ذبیح اللہ مجاہد کے بیان کو مسترد کر دیا ہے اور اسے گمراہ کن قرار دیا ہے۔ وزارت اطلاعات و نشریات نے کہا ہے کہ استنبول مذاکرات سے متعلق حقائق کو افغان ترجمان نے توڑ مروڑ کر پیش کیا۔
وزارت کا کہنا ہے کہ پاکستان نے افغان سرزمین پر موجود دہشت گردوں کی گرفتاری کا مطالبہ کیا اور افغان فریق کے دعوے پر فوری طور پر تحویل کی پیشکش بھی کی۔ پاکستان کا مؤقف واضح مستقل اور ریکارڈ پر موجود ہے اور افغانستان کی جانب سے کئے گئے جھوٹے دعوے حقائق کے منافی ہیں۔
وزارت اطلاعات نے واضح کیا کہ دہشت گردوں کی حوالگی سرحدی انٹری پوائنٹس سے ممکن ہے اور کسی بھی متضاد دعوے کو بے بنیاد اور گمراہ کن قرار دیا گیا ہے۔ پاکستان نے کہا کہ اس کے مؤقف کو غلط انداز میں پیش کرنا ناقابل قبول ہے۔
ذرائع کے مطابق وزارت اطلاعات نے سوشل میڈیا پلیٹ فارم ایکس پر جاری بیان میں کہا کہ پاکستان افغان ترجمان کے بیان کو مسترد کرتا ہے اور استنبول مذاکرات کے حوالے سے حقائق کو صحیح طور پر عوام کے سامنے پیش کرنے پر زور دیا۔