شمالی وزیرستان کے ڈی پی او وقار احمد خان کے اسکواڈ پر نامعلوم مسلح افراد نے حملہ کر دیا جس کے نتیجے میں 5 پولیس اہلکار زخمی ہو گئے۔
ڈی ایس پی میر علی قدرت اللہ خان داوڑ کے مطابق ڈی پی او وقار احمد خان میرانشاہ سے بنوں جا رہے تھے کہ ممش خیل کے علاقے میں بنوں-میرانشاہ مین روڈ پر تاک میں بیٹھے حملہ آوروں نے اسکواڈ پر فائرنگ کر دی۔
پولیس حکام نے تصدیق کی ہے کہ ڈی پی او حملے میں محفوظ رہے تاہم اسکواڈ کے 5 اہلکار زخمی ہوئے جنہیں فوری طور پر بنوں اسپتال منتقل کر دیا گیا۔
واقعے کے بعد پولیس کی بھاری نفری نے علاقے کو گھیرے میں لے کر سرچ آپریشن شروع کر دیا۔ ریجنل پولیس آفیسر سجاد خان بھی زخمی اہلکاروں کی عیادت کے لیے اسپتال پہنچے۔