اسلام آباد میں پاسپورٹ بنوانے کے نام پر نیا فراڈ سامنے آگیا ہے۔
ایک جعلساز نے ریجنل پاسپورٹ آفس G-10/4 کی جعلی گوگل میپ لسٹنگ بنا کر شہریوں سے پیسے بٹورنا شروع کردیے ہیں۔
اسکیمر نے گوگل میپس پر دفتر کا پتہ درج کر کے اپنا فون نمبر اور واٹس ایپ شامل کیا، جہاں سے وہ ایزی پیسہ اور جاز کیش کے ذریعے ”ایڈوانس بکنگ“ کے نام پر رقم وصول کررہا ہے۔
محکمہ امیگریشن اینڈ پاسپورٹ نے عوام کو الرٹ جاری کرتے ہوئے خبردار کیا ہے کہ کسی بھی معلومات یا سروس کے لیے صرف آفیشل نمبر 051-771-344-777 پر رابطہ کیا جائے۔
حکام کے مطابق ملزم کی تلاش جاری ہے اور گوگل سے جعلی نمبر ہٹانے کی درخواست کردی گئی ہے۔
سائبر ماہرین نے بتایا کہ گوگل کا تصدیقی نظام کمزور ہونے کی وجہ سے کوئی بھی شخص سرکاری اداروں کے نام پر جعلی اکاؤنٹس بنا سکتا ہے، اس لیے شہریوں کو آن لائن معلومات کی تصدیق ضرور کرنی چاہیے۔