چیئرمین جوائنٹ چیفس آف اسٹاف کمیٹی جنرل ساحر شمشاد مرزا کو سعودی عرب میں اعلیٰ عسکری اعزاز کنگ عبدالعزیز میڈل آف آنر (ایکسِلینٹ کلاس) سے نوازا گیا۔
آئی ایس پی آر کے مطابق جنرل ساحر شمشاد مرزا سرکاری دورے پر سعودی عرب پہنچے جہاں انہوں نے سعودی مسلح افواج کے چیف آف جنرل اسٹاف جنرل فیاض بن حامد الرویلی سے ملاقات کی۔
ملاقات میں خطے کی سلامتی، عالمی صورتِ حال، اور دفاعی تعاون کے فروغ پر تبادلہ خیال کیا گیا۔ دونوں عسکری رہنماؤں نے پاکستان اور سعودی عرب کے دیرینہ برادرانہ تعلقات کو مزید مستحکم کرنے کے عزم کا اظہار کیا۔
دورے کے دوران پاکستان اور سعودی عرب کے درمیان عسکری تعاون کو مضبوط بنانے میں نمایاں کردار پر جنرل ساحر شمشاد مرزا کو کنگ عبدالعزیز میڈل آف آنر سے نوازا گیا جو سعودی عرب کا سب سے اعلیٰ سطح کا عسکری اعزاز ہے۔
سعودی عسکری قیادت نے پاکستانی افواج کی پیشہ ورانہ مہارت کو سراہا اور دہشت گردی کے خلاف قربانیوں پر پاکستانی فوج کو خراجِ تحسین پیش کیا۔
آئی ایس پی آر کے مطابق جنرل ساحر شمشاد مرزا کا یہ دورہ دونوں برادر ممالک کے دفاعی اور عسکری تعلقات کے فروغ میں ایک اہم سنگِ میل ثابت ہوگا۔