نادرا نے شہریوں کی سہولت کے لیے ایک بڑی پیش رفت کا اعلان کرتے ہوئے بتایا ہے کہ اب گاڑیوں کی خرید و فروخت کے لیے بائیومیٹرک تصدیق کے لیے لمبی قطاروں میں کھڑے ہونے کی ضرورت نہیں رہی۔ یہ سہولت اب پاک آئی ڈی (Pak ID) موبائل ایپ کے ذریعے آن لائن دستیاب ہے۔
ترجمان نادرا کے مطابق اسلام آباد میں رجسٹرڈ گاڑیوں کی خرید و فروخت کرنے والے شہری گھر بیٹھے بائیومیٹرک تصدیق مکمل کر سکتے ہیں۔ صارفین صرف پاک آئی ڈی ایپ میں لاگ اِن ہو کر ضروری مراحل مکمل کریں اور ان کی تصدیق آن لائن ہو جائے گی۔
نادرا کا کہنا ہے کہ بائیومیٹرک تصدیق مکمل ہونے کے بعد گاڑی کی ٹرانسفر سے متعلق باقی کارروائیاں متعلقہ ادارے میں معمول کے مطابق انجام دی جائیں گی۔ اس ڈیجیٹل سہولت سے شہریوں کا وقت، محنت اور اخراجات میں واضح کمی آئے گی۔
مزید بتایا گیا ہے کہ یہ اقدام شہریوں کو جدید اور آسان سہولیات فراہم کرنے کی حکومتی کوششوں کا حصہ ہے۔