وفاقی آئینی عدالت میں دو مزید ججز جسٹس روزی خان اور جسٹس ارشد حسین شاہ نے اپنے عہدے کا حلف اٹھا لیا ہے جس کے بعد عدالت کے ججز کی تعداد سات ہوگئی ہے۔
حلف برداری کی تقریب اسلام آباد ہائی کورٹ کے کانفرنس روم میں ہوئی جس میں چیف جسٹس امین الدین خان نے نئے ججز سے حلف لیا۔ تقریب میں وفاقی آئینی عدالت کے دیگر ججز، آئینی عدالت کے اسٹاف اور عدالتی افسران بھی موجود تھے۔
چیف جسٹس امین الدین خان نے وفاقی آئینی عدالت کے لیے تین بینچ تشکیل دے دیے ہیں،پہلے بینچ میں چیف جسٹس امین الدین خان، جسٹس علی باقر نجفی، جسٹس ارشد حسین، دوسرے بینچ میں جسٹس حسن رضوی، جسٹس کے کے آغا اور تیسرے بینچ میں جسٹس عامر فاروق، جسٹس روزی خان شامل ہیں۔
آج سے عدالت نے باقاعدہ مقدمات کی سماعت کا آغاز کر دیا ہے۔ وفاقی آئینی عدالت کے ججز آج سے مختلف بینچز کے تحت مقدمات سنیں گے جبکہ اسلام آباد ہائی کورٹ کی بعض عدالتیں آئینی عدالت کے لیے مختص کی گئی ہیں۔ عدالت کے آغاز میں تلاوتِ قرآن بھی کی گئی۔
یہ وفاقی آئینی عدالت ستائیسویں آئینی ترمیم کے تحت قائم کی گئی ہے، جس میں مجموعی طور پر 13 ججز شامل ہوں گے۔ صدرِ مملکت آصف علی زرداری نے چند روز قبل نئے ججز کے لیے صدارتی آرڈر جاری کیا تھا۔
عدالتی کارروائی کے آغاز کے ساتھ ہی وفاقی آئینی عدالت ملکی تاریخ میں مقدمات کی باقاعدہ سماعت کرنے والی اعلیٰ عدالت کے طور پر کام شروع کر چکی ہے۔