بنگلادیشی کی سابق وزیر اعظم شیخ حسینہ واجد کے سزائے موت کے عدالتی فیصلے پر بھارتی وزارت خارجہ کا ردعمل سامنے آگیا۔
بھارتی وزارت خارجہ کے بیان میں کہا گیا کہ بھارت نے شیخ حسینہ واجد کے خلاف فیصلہ دیکھا ہے۔ بھارت پڑوسی کی حیثیت سے بدستور بنگلا دیشی عوام کے بہترین مفادات کے لیے پُرعزم ہے۔
بھارتی وزارت خارجہ نے بیان میں کہا ہے کہ ان مفادات میں بنگلا دیشی عوام کا امن، جمہوریت اور استحکام شامل ہے، بھارت اس مقصد کیلیے تمام اسٹیک ہولڈرز کے ساتھ ہمیشہ تعمیری بات چیت جاری رکھے گا۔
یاد رہے کہ پیر کو بنگلادیش کے جسٹس محمد غلام مرتضیٰ کی سربراہی میں 3 رکنی ٹربیونل نے سابق وزیراعظم شیخ حسینہ واجد کے خلاف دائر مقدمات کا فیصلہ سناتے ہوئے انہیں انسانیت کے خلاف جرائم کا مجرم قرار دیا۔
عدالت نے تشدد پر اکسانے، قتل کے حکم کے الزام میں شیخ حسینہ کو عمر قید اور دیگر 3 الزامات میں سزائے موت سنائی۔ عدالت نے بنگلادیش کے سابق وزیر داخلہ اسد الزماں کمال کو بھی سزائے موت کا حکم دیا۔
مذکورہ فیصلے کے بعد بنگلادیش نے بھارت میں پناہ لینے والی شیخ حسینہ واجد اور کمال کی فوری حوالگی کا مطالبہ کیا ہے۔