صوبائی وزیر تعلیم ارشد ایوب خان نے محکمہ تعلیم میں جاری خیبر پختونخوا ہیومن کیپیٹل انویسٹمنٹ پراجیکٹ میں مالی بے ضابطگی اور ناقص مٹیریل کے استعمال کی شکایت کا نوٹس لیتے ہوئے متعلقہ حکام سے دو ہفتوں کے اندر رپورٹ فراہم کرنے کی ہدایت کی ہے۔
انہوں نے کہا کہ عوامی فلاح کے لیے شروع کردہ منصوبوں میں ناقص مٹیریل کے استعمال اور مالی بے ضابطگی ہر گز برداشت نہیں اور ملوث اہلکاروں کے خلاف سخت تادیبی کارروائی کی جائے گی۔ انہوں نے مانیٹرنگ حکام کو ہدایت کی کہ فوری طور پر پراجیکٹ میں شامل اسکولوں کا معائنہ کریں اور کوالٹی کے ساتھ مالی حساب کتاب کی بھی جانچ کی جائے اور دو ہفتوں کے اندر رپورٹ فراہم کی جائے۔
اس پراجیکٹ کے تمام کام کی ایجوکیشن مانیٹرنگ ٹیم کے علاوہ صوبائی پلاننگ اینڈ ڈیولپمنٹ ڈیپارٹمنٹ کی مانیٹرنگ ٹیم کے ذریعے بھی جانچ کی جائے گی۔ انہوں نے کہا کہ فراہم کردہ رپورٹس پر سختی سے ایکشن لیا جائے گا اور ملوث ملازمین یا ٹھیکیداروں کو قرار واقعی سزا دی جائے گی۔
انہوں نے کہا کہ ہم میرٹ و شفافیت پر یقین رکھتے ہیں اور کسی بھی قسم کی کوئی غلطی یا کوتاہی ہر گز برداشت نہیں کی جائے گی۔ انہوں نے مانیٹرنگ حکام کو یہ بھی ہدایت کی کہ محکمہ تعلیم کے تمام جاری پراجیکٹس کی سخت ترین مانیٹرنگ کریں اور کام کے معیار کو یقینی بنایا جائے۔