پاکستان کرکٹ ٹیم کے سابق کپتان یونس خان کی گلوکاری کی ایک دلچسپ ویڈیو سوشل میڈیا پر توجہ حاصل کر رہی ہے۔ یہ کلپ سابق فاسٹ بولر عمر گل نے شیئر کیا ہے، جس میں یونس خان کو ٹیم ڈنر کے دوران بالی ووڈ کا مشہور گانا گاتے دیکھا جا سکتا ہے۔
ویڈیو میں وہ ’میرے دوست قصہ یہ کیا ہو گیا، سنا ہے کہ تو بے وفا ہو گیا‘ گا رہے ہیں، اور ماحول مکمل طور پر ہلکا پھلکا اور خوشگوار نظر آتا ہے۔ گانا گاتے ہوئے انہوں نے ایک جگہ بولوں میں معمولی غلطی کی، جس پر یونس خان خود بھی مسکرا اٹھے اور دیگر کھلاڑی بھی ہںس پڑے۔ اس بے ساختہ لمحے نے ویڈیو کو مزید دلچسپ بنا دیا۔
سابق کرکٹرز ان دنوں ہوسٹن میں ایک جاری لیگ کے سلسلے میں موجود ہیں، اور ٹیم ڈنر کے موقع پر یونس خان کی گائیکی نے سب کو خوشگوار حیرت میں ڈال دیا۔ سوشل میڈیا صارفین بھی ان کی سادہ مزاجی اور بے تکلف انداز کی تعریف کر رہے ہیں۔