وزیر اعلیٰ خیبر پختونخوا سہیل آفریدی نے الیکشن کمیشن کی جانب سے طلبی کے خلاف پشاور ہائیکورٹ سے رجوع کرلیا ہے۔
وزیراعلیٰ کے وکیل کی جانب سے دائر کردہ درخواست میں موقف اپنایا گیاکہ بغیر کسی وجہ اور جواز کے درخواست گزار کو الیکشن کمیشن نے طلب کیا، مختلف الزامات کی بنیاد پر وزیراعلیٰ کو بلایا گیا ہے۔
درخواست میں موقف اپنایا گیا ہے کہ الیکشن کمیشن کا وزیر اعلیٰ کو طلب کرنا غیر قانونی ہے جبکہ یہ اقدام آرٹیکل 9، 10 اے، 17 اور 25 کی خلاف ورزی ہے۔
درخواست میں واضح کیا گیا کہ وزیر اعلیٰ خیبر پختوتنخوا نے نہ کسی کے لیے مہم چلائی اور نہ ہی الیکشن کمیشن کی کوئی خلاف ورزی کی ہے۔
درخواست میں استدعا کی گئی کہ الیکشن کمیشن کی جانب سے طلبی کا نوٹس غیر قانونی قرار دیا جائے اور وزیر اعلیٰ کے خلاف کسی بھی قسم کی کارروائی سے روکا جائے۔
واضح رہے کہ الیکشن کمیشن کی جانب سے ذاتی حیثیت میں طلب کیے جانے پر وزیر اعلیٰ خیبر پختونخوا سہیل آفریدی نے وکیل کو بھیج دیا تھا۔