وزیراعلیٰ خیبر پختونخوا سہیل آفریدی نے کہا ہے کہ جو بھی ہمارے جوانوں کو شہید کرتا ہے وہ دہشتگرد ہے اور دہشتگردی کے خاتمے کے سوا کوئی متبادل نہیں۔
صحافیوں سے گفتگو میں وزیراعلیٰ کا کہنا تھا کہ خیبر پختونخوا پولیس مکمل طور پر اہل ہے اور دہشتگردوں سے نمٹنے کی پوری صلاحیت رکھتی ہے۔ پولیس کے لیے جدید آلات کی خریداری کی منظوری دی جا چکی ہے۔ انہوں نے مزید کہا کہ وفاقی حکومت واجبات ادا کرے تو پولیس، صحت اور دیگر شعبوں میں مزید بہتری لائی جا سکتی ہے اور صوبے میں فارنزک لیب قائم کی جائے گی۔
وزیراعلیٰ نے کہا کہ پی ٹی آئی کے اقدامات کی وجہ سے عوام نے خیبر پختونخوا میں تیسری بار موقع دیا۔ موجودہ چیف سیکرٹری اور آئی جی بہترین کام کر رہے ہیں اور وہ چاہتے ہیں کہ آئی جی اپنا کام جاری رکھیں۔
کرپشن سے متعلق انہوں نے کہا کہ وفاق خیبر پختونخوا کا آڈٹ کرے، اور صوبے کو واجبات بھی فراہم کرے۔ اگر میرا بھائی بھی کرپشن میں ملوث ہوا تو اسے سزا ملنی چاہیے۔
انہوں نے کہا کہ دہشت گردی نے صوبے کے ہر شعبے کو متاثر کیا ہے اور امن کے لیے وفاق کا تعاون کریں گے۔ دہشتگردوں کو سزا دینے کے لیے صوبائی سطح پر قانون سازی کی ہدایت کی گئی ہے اور انسداد دہشتگردی کے قوانین میں موجود سقم ختم کیے جائیں گے۔