وزیراعظم محمد شہباز شریف نے ضلع بنوں میں فتنہ الخوارج کے دہشت گردوں کے خلاف سیکیورٹی فورسز کی کامیاب کارروائی پر انہیں زبردست خراجِ تحسین پیش کیا ہے، جس کے نتیجے میں 8 خطرناک دہشت گرد ہلاک کیے گئے۔
وزیراعظم نے اپنے بیان میں کہا کہ عزمِ استحکام کے ویژن کے تحت سیکیورٹی فورسز دہشت گردی کے خلاف بڑی کامیابیاں حاصل کر رہی ہیں۔ پوری قوم دہشت گردی کے خلاف اس جنگ میں پاکستان کی افواج کے ساتھ کھڑی ہے۔ ملک سے ہر قسم کی دہشت گردی کے مکمل خاتمے کے لیے پُرعزم ہیں۔
انہوں نے مزید کہا کہ سیکیورٹی فورسز کی بہادری، پیشہ ورانہ صلاحیت اور قربانیوں کی بدولت ملک میں امن و امان کی صورتحال بہتر ہو رہی ہے جبکہ دہشت گردی کے مکمل خاتمے کے لیے کارروائیاں مزید تیز کی جائیں گی۔
سیکیورٹی ذرائع کے مطابق کارروائی کے دوران دہشت گردوں کے ٹھکانوں سے اسلحہ و گولہ بارود بھی برآمد ہوا۔