ڈیرہ غازی خان: الیکشن کمیشن نے ضابطہ اخلاق کی خلاف ورزی پر پاکستان مسلم لیگ (ن) کے رہنما طلال چوہدری کے بھائی، بلال چوہدری کی کامیابی کا نوٹیفکیشن روک دیا ہے۔
چیف الیکشن کمشنر نے واضح کیا ہے کہ بلال چوہدری کو نااہل نہیں کیا جا رہا، بلکہ صرف کامیابی کے نوٹیفکیشن کے اجرا پر عارضی روک لگائی گئی ہے۔
ڈیرہ غازی خان ضمنی انتخابات میں ضابطہ اخلاق کی خلاف ورزی کے کیس کی سماعت چیف الیکشن کمشنر کی سربراہی میں چار رکنی بینچ نے کی۔ سماعت کے دوران کمیشن حکام نے مؤقف اختیار کیا کہ طلال چوہدری نے واضح طور پر ضابطہ اخلاق کی خلاف ورزی کی ہے۔
چیف الیکشن کمشنر نے کہا کہ وزیر مملکت کسی انتخابی مہم میں حصہ لینے کے مجاز نہیں ہیں اور خلاف ورزی کرنے والوں کے خلاف سخت کارروائی کی جائے گی۔ انہوں نے مزید کہا کہ طلال چوہدری نے ضابطہ اخلاق کی خلاف ورزی کی اور پیش ہونا بھی گوارا نہیں کیا۔ تاہم طلال چوہدری کے وکیل نے یقین دہانی کرائی کہ موکل کمیشن کے سامنے پیش ہوں گے، جس کے بعد انہیں حاضری سے استثنیٰ دے دیا گیا۔
سماعت کے دوران مشیر حذیفہ رحمان نے الیکشن کمیشن سے غیر مشروط معافی مانگ لی اور کہا کہ میں ہمیشہ قانون کا پابند رہتا ہوں۔ انہوں نے وضاحت کی کہ میں کارنر میٹنگ میں نہیں، بلکہ میوزیکل نائٹ میں شرکت اور تقریر کی تھی۔
چیف الیکشن کمشنر نے ہدایت کی کہ کیس کی دستاویزات حذیفہ رحمان کے سپرد کی جائیں اور وہ باضابطہ جواب جمع کرائیں۔ بعدازاں الیکشن کمیشن نے کیس کی سماعت ملتوی کردی۔