وزیر دفاع خواجہ محمد آصف نے سوشل میڈیا پلیٹ فارم ایکس پر جاری بیان میں پاکستان تحریک انصاف کی بیرونِ ملک قیادت پر شدید تنقید کرتے ہوئے انہیں ”بھگوڑا“ قرار دیا اور الزام لگایا کہ وہ پہلے پاکستان کو لوٹتے رہے اور اب بیرونِ ملک پاکستانیوں سے رقم اکٹھی کر کے پر تعیش زندگی گزار رہے ہیں۔
خواجہ آصف نے کہا کہ پی ٹی آئی رہنما یورپ میں پاکستان کے لیے اہم تجارتی رعایت GSP+ کے خلاف مہم چلا کر ملک دشمنی کا ارتکاب کر رہے ہیں۔ انہوں نے چیلنج دیا کہ اگر ہمت ہے تو پاکستان آ کر سیاسی جنگ لڑیں، بیرونِ ملک سے ملکی مفادات کو نقصان نہ پہنچائیں۔
وزیر دفاع نے ماضی کا حوالہ دیتے ہوئے کہا کہ بے نظیر بھٹو شہید اور نواز شریف دونوں نے سیاسی جدوجہد میں قید و بند کی صعوبتیں برداشت کیں، ان کے خاندان گرفتار ہوئے، آمریت نے ان پر ظلم ڈھایا، مگر کبھی کسی نے وطن عزیز کے مفادات کو نشانہ نہیں بنایا۔ انہوں نے کہا کہ ’’سیاسی لڑائی ہمیشہ پاکستان کی سرزمین پر لڑی گئی اور اس کی قیمت بھی چکائی گئی، مگر ملک کے خلاف مہم کسی نے نہیں چلائی۔‘‘
خواجہ آصف کے مطابق تحریک انصاف کی قیادت نے اقتدار سے محرومی کے بعد پہلے آئی ایم ایف کو خط لکھ کر پاکستان کو معاشی بحران کی طرف دھکیلنے کی کوشش کی، اور اب پاکستان کی ایکسپورٹ کو نقصان پہنچانے کے لیے بیرونِ ملک لابنگ کر رہی ہے، جو دشمن ملک بھی کرے تو سمجھ آتی ہے مگر خود کو پاکستانی کہنے والے کریں تو یہ ’’ننگِ وطن‘‘ اور ’’غداری‘‘ کے مترادف ہے۔