لاہور کے جنرل اسپتال میں ڈاکٹروں نے غیر معمولی پیشہ ورانہ مہارت کا ثبوت دیتے ہوئے ایک تین سالہ بچی کی جان بچا لی۔ معالجین نے ایک حساس طریقہ کار کے ذریعے بچی کے معدے میں پھنسی ہوئی ایک ہیئر پن کو بحفاظت باہر نکال لیا۔
جنرل اسپتال لاہور کے ترجمان کے مطابق، چونگی امر سدھو کی رہائشی تین سالہ بچی، جس کا نام جنت بتایا گیا ہے، کھیلتے ہوئے غلطی سے ایک ہیئر پن نگل گئی تھی۔ گھر والے اسے فوری طور پر اسپتال لے کر پہنچے، جہاں ایکسرے کے بعد انکشاف ہوا کہ ہیئر پن بچی کے معدے میں موجود ہے۔ اس نازک صورتحال کے پیش نظر فوری طور پر آپریشن کا فیصلہ کیا گیا۔
بچی کے جسم سے ہیئر پن نکالنے کا یہ حساس پروسیجر اینڈو اسکوپی کے ذریعے انجام دیا گیا، جو ڈاکٹر حوریہ رحمان کی سربراہی میں کامیابی سے مکمل ہوا۔ اس پوری کارروائی کی نگرانی تجربہ کار ڈاکٹروں کی ایک ٹیم نے کی، جن میں پروفیسر شاہد، پروفیسر فریاد، اور ڈاکٹر حسن سلیمان شامل تھے۔ ڈاکٹروں کی بروقت اور مؤثر کارکردگی کی وجہ سے بچی کو کسی بڑی تکلیف سے بچا لیا گیا اور وہ اب صحت یاب ہو رہی ہے۔