وفاقی دارالحکومت اسلام آباد کو باقاعدہ طور پر صوبے کا درجہ دینے کے حوالے سے اہم پیش رفت سامنے آئی ہے۔
ذرائع کے مطابق اعلیٰ حکام نے اس مجوزہ منصوبے پر غور و خوض شروع کر دیا ہے، جبکہ پاکستان کے اعلیٰ ترین فیصلہ ساز حلقوں نے بھی اس تجویز کی حمایت کا عندیہ دیا ہے۔
ذرائع کے مطابق مجوزہ نئے صوبے میں نہ صرف اسلام آباد بلکہ ملک کے خوبصورت ترین سیاحتی مقامات میں شمار ہونے والا گلیات اور نتھیا گلی بھی شامل کرنے کی تجویز پیش کی گئی ہے۔ منصوبے کے تحت اسلام آباد سے گلیات تک خصوصی ٹنل کے ذریعے براہِ راست لنک قائم کرنے پر بھی غور ہو رہا ہے، جس سے سیاحت اور علاقائی ترقی کو فروغ ملنے کی توقع ہے۔
مزید برآں، مجوزہ صوبے میں راولپنڈی کو شامل کرنے کے امکان پر بھی سنجیدگی سے غور جاری ہے۔ اس سلسلے میں مختلف اداروں اور متعلقہ محکموں کے درمیان مشاورت جاری ہے۔
اگر یہ تجویز منظور ہوجاتی ہے تو پاکستان کے انتظامی نقشے میں ایک نئے صوبے کا اضافہ ہوگا، جس سے خطے کی سیاست، معیشت اور گورننس پر یقینی طور پر دور رس اثرات مرتب ہوں گے۔