ایک جانب تو ٹرائی سیریز کے فائنل میں پاکستان نے سری لنکا کو چھ وکٹوں سے شکست دی اور دوسری جانب جنوبی افریقہ کہ کھلاڑی فاف ڈپلیسی کے پی ایس ایل کھیلنے کی خبر نے پاکستانی کرکٹ فینز کی ٹرائی سیریز جیتنے کی خوشی کو چار چاند لگا دیے۔
ٹرائی سیریز کے فائنل میں پاکستان نے سری لنکا کو چھ وکٹوں سے شکست دی ہے مگر آج شام سے سوشل میڈیا پر جنوبی افریقہ کے کھلاڑی فاف ڈوپلیسی کا چرچا رہا ہے۔
فاف ڈوپلیسی نہ تو یہ میچ کھیل رہے تھے اور نہ ہی ان کا دونوں ٹیموں سے کوئی تعلق ہے۔ بلکہ راولپنڈی کرکٹ سٹیڈیم میں پاکستان اور سری لنکا کی کرکٹ ٹیموں کے درمیان ٹرائی سیریز فائنل کے دوران فاف ڈوپلیسی نے اعلان کیا تھا کہ وہ آئندہ سال آئی پی ایل کی بجائے پاکستان سُپر لیگ کھیلیں گے۔
دریں اثنا سنیچر کے روز ٹرائی سیریز فائنل میں پاکستان نے ٹاس جیت کر سری لنکا کو بیٹنگ کی دعوت دی تھی۔ سری لنکا نے پہلے بیٹنگ کرتے ہوئے مقررہ 20 اوورز میں 114 رنز بنائے۔
پاکستانی ٹیم جب ہدف کے تعاقب کے لیے میدان میں اُتری تو نہایت پُر اعتماد انداز میں بیٹنگ کا آغاز ہوا۔
پاکستان کی پہلی وکٹ آٹھویں اوور میں تب گری کہ جب صاحبزادہ فرحان 22 گیندوں پر 23 رنز بنا کر ایشان ملنگا کی گیند پر بولڈ ہو گئے۔
اُن کے آوٹ ہو جانے کی بعد پاکستان کے دوسرے آوٹ ہونے والے کھلاڑی تھے صائم ایوب جن کی وکٹ وانندو ہسارنگا نے لی وہ 33 گیندوں پر 36 رنز بنا کر آؤٹ ہوئے۔ صائم کے بعد 98 کے مجموعی سکور پر 16ویں اوور میں پاکستانی کرکٹ ٹیم کے کپتان سلمان علی آغا 14 گیندوں پر 14 رنز بنا کر پویلین لوٹ گئے۔
پاکستان کی جانب سے آؤٹ ہونے والے آخری کھلاڑی فخر زمان تھے کہ جو 18ویں اوور کی پہلی گیند پر پون رتھنائکے کا شکار بنے، انھوں نے پانچ گیندوں پر تین سکور بنائے۔
سری لنکا کی جانب سے پاون رتھنایک نے 2، وانندو ہاسارنگا اور ایشان مالینگا نے ایک،ایک وکٹ اپنے نام کی۔
سری لنکن اننگز کا احوال
ٹرائی نیشن سیریز کے فائنل میں پاکستانی بولر کی عمدہ بولنگ کے نتیجے میں سری لنکا ٹیم بڑا ہدف دینے میں ناکام رہی اور مقررہ 20 اوورز میں 114 رنز پر ہی ڈھیر ہوگئی۔
راولپنڈی کرکٹ سٹیڈیم میں کھیلے جارہے میچ سری لنکا ٹیم کی پہلی وکٹ 20 رنز پر گری جس کے بعد کامل مشارا اور وکٹ کیپر کوشال مینڈس کے درمیان 47 گیندوں پر 64 رنز کی شاندار پارٹنر شپ نے کسی حد تک سری لنکن ٹیم کو آگے بڑھنے اور ایک اچھا ہدف دینے کی کوشش تو کی مگر یہ شراکت داری زیادہ دیر قائم نہ رہ سکی۔
84 کے مجموعے پر کوشال مینڈس کے آؤٹ ہو جانے کے بعد سری لنکن بلے بازوں میں سے کوئی بھی پاکستانی بولنگ لائو اپ کے سامنے جم کر نہیں کھیل سکا اور پویلین کی جانب لوٹ جانے والوں کی لائن لگ گئی۔ سری لنکا کی پوری ٹیم 20 اوورز بھی مکمل کھیلنے میں کامیاب نہیں ہو پائی اور114 رنز بنا کر 20ویں اوور کی پہلی گیند پر آل آؤٹ ہوگئی۔
پاکستان کی جانب سے شاہین شاہ آفریدی اور محمد نواز نے تین تین کھلاڑیوں کو آؤٹ کیا۔ ابرار احمد نے دو وکٹیں حاصل کیں جبکہ صائم ایوب اور سلمان مرزا نے ایک ایک کھلاڑی کو آؤٹ کیا۔
تاہم پاکستان کی جانب سے ٹیم کے سابق کپتان بابر اعظم نے نہایت اچھی فیلڈنگ کا مظاہرہ کیا اور تین شاندار کیچز پکڑے۔
ٹرائی نیشن سیریز کے فائنل میں پاکستان کی جانب سے ٹیم میں ایک تبدیلی کی گئی تھی جس میں فاسٹ بولر وسیم جونیئر کی جگہ شاہین شاہ آفریدی کو ٹیم میں شامل کیا گیا تھا۔
پاکستانی بلے باز بابر اعظم کی فائنل میچ میں تین کیچز کی تعریف اُن کے فیز نے سوشل میڈیا پر خوب کی جہاں گُلشن زہرہ نے بابر اعظم کے یہ تین کیچ پکڑتے ہوئے کی تصویر شئیر کی اور شاباش دی وہیں رانا احمد نے نے اُن کی تعریف میں لکھا ’بابر اعظم نے شاندار کیچ پکڑے۔‘
پاکستانی کرکٹ فینز نے جہاں بابر اعظم کی تعریف کی وہیں کُچھ فینز محمد نواز کی فائنل میچ میں تین وکٹوں کا ذکر کرتے بھی نظر آئے۔
فرید خان نے ایکس پر محمد نواز کی تعریف کی اور لکھا کہ ’محمد نواز پاکستان ٹیم میں واپسی کے بعد سب سے زیادہ بہتر انداز میں کھیل پیش کرنے والے کھلاڑی ہیں۔‘
فاف ڈو پلیسی آئی پی ایل کی بجائے اب پی ایس ایل کیوں کھیلیں گے؟
جنوبی افریقی کھلاڑی فاف ڈوپلیسی نے اپنے ایک بڑے فیصلے کا اعلان سنیچر کے روز سوشل میڈیا پر کیا، جس میں انھوں نے لکھا کہ وہ گذشتہ 14 سال سے مسلسل ہر سال آئی پی ایل کا حصہ رہے ہیں مگر اگلے سال ایسا نہیں ہوگا۔ یعنی اس بار وہ آئی پی ایل کی آکشن کا حصہ نہیں بنیں گے، جس میں ٹیموں کی طرف سے کھلاڑیوں کی بولی لگائی جاتی ہے۔
انھوں نے اپنی پوسٹ میں مزید لکھا کہ ’رواں برس میں نے ایک نئے چیلنج کو قبول کرنے کا فیصلہ کیا اور اب پی ایس ایل سیزن 11 میں کھیلنا چاہتا ہوں۔‘
فاف ڈوپلیسی نے کہا کہ ’یہ میرے لیے ایک دلچسپ قدم ہے، یہ نیا تجربہ کرنے اور ایک کھلاڑی کے طور پر آگے بڑھنے کا بھی موقع ہے۔‘
انھوں نے اپنے اس بیان میں اس بات کا بھی ذکر کیا کہ ’انڈیا کی محبت میرے دل میں ہے اور ایسا نہیں ہے کہ میں دوبارہ آئی پی ایل نہیں کھیلوں گا۔‘
انھوں نے مزید کہا کہ ’مجھے ایک نئی لیگ کو قریب سے جاننے کا موقع ملے گا۔ پاکستان سپر لیگ بھرپور جذبے اور ٹیلنٹ سے بھری ہوئی ہے اور میں پاکستان کی روایتی مہمان نوازی اور پُرجوش شائقین کے سامنے کھیلنے کا منتظر ہوں، آپ سے جلد ملاقات ہوگی۔‘
فاف ڈوپلیسی کی ایکس پر اس پوسٹ کو پاکستان سُپر لیگ کے آفیشل ایکس اکاؤنٹ کی جانب سے ری پوسٹ کیا گیا اور ساتھ لکھا کہ ’فاف ڈوپلیسی ہم آپ کو پی ایس ایل میں خوش آمدید کہتے ہیں۔‘
اسی پوسٹ میں مزید یہ بھی تھا کہ ’کیا ہمارے کرکٹ فینز ایسا دیکھنے کے لیے تیار ہیں۔‘
واضح رہے کہ فاف ڈوپلیسی نے آئی پی ایل کھیلنے کا آغاز 2012 میں کیا تھا جب انھوں نے چنائی سُپر کنگز میں شمولیت اختیار کی تھی۔
سنہ 2023 میں ہونے والی آئی پی ایل کے سیزن میں فاف ڈپلیسی نے رائل چیلنجرز بنگلور کی کپتانی بھی کی۔
