ضلع کرم کی سنٹرل کرم تحصیل کے علاقے مناتو میں تور غنڈء چیک پوسٹ کے قریب سیکیورٹی فورسز پر دہشت گردوں نے حملہ کردیا، جس کے نتیجے میں پاک فوج کے 6 جوان شہید جبکہ 6 زخمی ہوگئے۔
پولیس کے مطابق شہید ہونے والوں میں حوالدار شوکت حبیب، حوالدار سبزل، سپاہی عبدالحالق، سپاہی رفیع اللہ، لانس نائیک امجد اور سپاہی وقاص شامل ہیں، جبکہ زخمیوں میں ایف سی اہلکار محمد جاوید خان، محمد ایاز، رب نواز، عامر شہزاد، محمد رضوان اور محمد زید سلطان شامل ہیں۔
زخمی اہلکاروں کو فوری طور پر قریبی اسپتال منتقل کر دیا گیا، جہاں اسپتال ذرائع کے مطابق دو اہلکاروں کی حالت تشویشناک ہے۔ حملے کے بعد سیکیورٹی فورسز نے جوابی کارروائی کرتے ہوئے دہشت گردوں کے ٹھکانوں کو توپ خانے سے نشانہ بنایا، جس کے نتیجے میں متعدد دہشت گرد ہلاک و زخمی ہوئے۔