چیف آف ڈیفنس فورسز فیلڈ مارشل سید عاصم منیر نے گوجرانوالہ اور سیالکوٹ گیریژن کا دورہ کیا جہاں انہوں نے فارمیشن کی آپریشنل تیاری، جدید ٹریننگ سہولیات اور جنگی استعداد بڑھانے کے اقدامات کا جائزہ لیا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل نے فیلڈ ٹریننگ ایکسرسائز اور جدید سیمولیٹر ٹریننگ کا مشاہدہ کیا اور اعلیٰ پیشہ ورانہ معیار کی تعریف کی۔ انہوں نے افسران اور جوانوں سے گفتگو کرتے ہوئے ان کے بلند حوصلے اور قومی سلامتی کے لیے غیر متزلزل عزم کو سراہا۔
فیلڈ مارشل سید عاصم منیر نے کہا کہ پاک فوج اندرونی و بیرونی چیلنجز، انتہاپسندانہ نظریات اور قومی استحکام کو نقصان پہنچانے والی تقسیم پسند قوتوں سے نمٹنے کے لیے مکمل طور پر تیار اور پرعزم ہے۔ انہوں نے جدید جنگی ماحول میں ٹیکنالوجی سے ہم آہنگی، فوری فیصلہ سازی اور سخت، مقصد پر مبنی تربیت کی اہمیت پر زور دیا۔