سڈنی بیچ پر فائرنگ سے پہلے بم پھینکے گئے، ملزمان نے فائرنگ کی مشق بھی کی

آسٹریلیا کے شہر سڈنی میں دہشتگردانہ حملے کی تازہ رپورٹ میں انکشاف کیا گیا ہے کہ بھارتی نژاد 50 سالہ ساجد اکرم اور اس کے 24 سالہ بیٹے نوید اکرم نے شہریوں پر فائرنگ سے قبل چار دیسی ساختہ بم پھینکے جو خوش قسمتی سے پھٹ نہیں سکے۔

عدالتی دستاویز کے مطابق ملزمان نے بونڈائی بیچ پر تقریب سے پہلے مہینوں تک اس حملے کی منصوبہ بندی کی اور دیہی علاقے میں اسلحہ چلانے کی تربیت حاصل کی۔ دستاویز میں آئی ای ڈیز کی تصاویر اور ویڈیوز شامل ہیں، جن میں ملزمان داعش کے جھنڈے کے سامنے شہریوں پر فائرنگ کی ویڈیوز ریکارڈ کرتے دکھائی دیتے ہیں۔

واضح رہے کہ 14 دسمبر کو ہنوکا کی تقریب میں فائرنگ سے 15 افراد ہلاک اور 30 سے زائد زخمی ہوئے تھے۔ ساجد اکرم پولیس فائرنگ سے ہلاک ہوا جبکہ اس کا بیٹا زخمی حالت میں اسپتال منتقل کیا گیا، جہاں ان پر دہشت گردی اور قتل کے 40 الزامات عائد کیے گئے ہیں۔