وزیراعظم شہباز شریف نے انڈر 19 ایشیا کپ میں شاندار کامیابی حاصل کرنے والی پاکستانی کرکٹ ٹیم کے اعزاز میں خصوصی ظہرانے کا اہتمام کیا اور ٹیم کی کارکردگی کو سراہا۔
اس موقع پر ٹیم کے ہیڈ کوچ شاہد انور نے بتایا کہ کھلاڑیوں کے انتخاب کا عمل 17 جون سے شروع ہوا، جس کے دوران 70 کھلاڑیوں کے ٹرائلز لیے گئے اور بعد ازاں حتمی اسکواڈ تشکیل دیا گیا۔ انہوں نے کہا کہ کھلاڑیوں کو ون ڈے ٹورنامنٹس میں کھیلنے کے مواقع فراہم کیے گئے جس سے انہیں قیمتی تجربہ حاصل ہوا۔
تقریب میں سابق کپتان سرفراز احمد نے ٹیم کی کارکردگی کو سراہتے ہوئے کہا کہ نوجوان کھلاڑیوں نے میدان میں بے خوف کرکٹ کھیلی اور اس کامیابی میں کوچنگ اسٹاف کا اہم کردار رہا۔ انہوں نے بتایا کہ وزیراعظم نے ملاقات کے دوران کھلاڑیوں کی حوصلہ افزائی بھی کی۔
سرفراز احمد کے مطابق وزیراعظم نے انڈر 19 ٹیم کے ہر کھلاڑی کے لیے ایک کروڑ روپے انعام کا اعلان کیا۔ انہوں نے امید ظاہر کی کہ یہ ٹیم مستقبل کے ٹورنامنٹس میں بھی شاندار کارکردگی کا تسلسل برقرار رکھے گی اور ملک کا نام روشن کرتی رہے گی۔