وفاقی وزیر برائے منصوبہ بندی احسن اقبال نے نجی ٹی وی چینل کے لائیو پروگرام کے دوران اچانک پیش آنے والی مداخلت پر وضاحت جاری کر دی ہے، جس کی ویڈیو سوشل میڈیا پر وائرل ہونے کے بعد صارفین کی جانب سے مختلف سوالات اٹھائے جا رہے تھے۔
گزشتہ روز احسن اقبال نجی ٹی وی کے ایک لائیو پروگرام میں گفتگو کر رہے تھے کہ اچانک مداخلت کے باعث ان کا موبائل فون بند ہو گیا اور نشریات میں مختصر تعطل آ گیا۔ ویڈیو سوشل میڈیا پر سامنے آتے ہی صارفین نے تشویش کا اظہار کرتے ہوئے واقعے کی وضاحت طلب کی۔
اس حوالے سے صحافی اجمل جامی کے ٹوئٹ کے جواب میں وفاقی وزیر نے بتایا کہ ایک شخص کی بحث کے باعث وقتی طور پر رکاوٹ پیش آئی جبکہ وہ شخص اس بات سے لاعلم تھا کہ لائیو نشریات جاری ہیں۔ احسن اقبال کے مطابق کچھ ہی دیر بعد انہوں نے دوبارہ پروگرام جوائن کر لیا۔
وفاقی وزیر نے کہا کہ اس معاملے پر غیر ضروری سیاست نہ کی جائے اور معاملے کو بلاوجہ متنازع نہ بنایا جائے۔
دوسری جانب وفاقی وزیر اطلاعات عطا اللہ تارڑ نے بھی سوشل میڈیا پر وضاحت کرتے ہوئے کہا کہ انہوں نے احسن اقبال سے بات کی ہے اور انہیں بتایا گیا کہ ایک بچہ غیر متوقع طور پر کمرے میں داخل ہو گیا تھا تاہم صورتحال معمول پر رہی اور احسن اقبال نے دوبارہ شو میں شرکت کر لی تھی۔