امریکی ریاست آرکنساس کے ایک خوش قسمت شہری نے کرسمس کی شام ہونے والی قرعہ اندازی میں پاوربال لاٹری کے ذریعے 1.817 بلین ڈالر کا جیک پاٹ جیت لیا جو امریکی تاریخ کا دوسرا سب سے بڑا اور 2025 کا سب سے بڑا پاوربال انعام ہے۔
میڈیا رپورٹس کے مطابق جیک پاٹ کا فاتح ٹکٹ لٹل راک کے مضافات میں صرف 2 ڈالر میں فروخت ہوا۔ پاوربال کے فاتح نمبر 04، 25، 31، 52، 59 اور پاوربال نمبر 19 تھے۔ یہ قرعہ اندازی گزشتہ تین ماہ کی مسلسل 46ویں قرعہ اندازی تھی، جس میں کسی بھی ٹکٹ ہولڈر کے تمام نمبرز میچ نہیں ہو سکے تھے، جس کے باعث جیک پاٹ کی رقم مسلسل بڑھتی رہی۔
آخری لمحات میں فروخت ہونے والے ٹکٹس نے جیک پاٹ کو متوقع رقم سے کہیں زیادہ بڑھا دیا جس کے تحت ایک بار میں نقد رقم لینے کا آپشن 834.9 ملین ڈالر رکھا گیا ہے۔
پاوربال پروڈکٹ گروپ کے چیئرمین اور آئیووا لاٹری کے چیف ایگزیکٹو آفیسر میٹ اسٹراؤن نے اسے غیر معمولی اور زندگی بدل دینے والی رقم قرار دیا۔ امریکا میں سب سے بڑا پاوربال جیک پاٹ 2022 میں کیلیفورنیا میں جیتا گیا تھا جس کی مالیت 2.04 ارب ڈالر تھی۔