وزیراعظم شہباز شریف کی دعوت پر متحدہ عرب امارات کے صدر شیخ محمد بن زاید النہیان آج سرکاری دورے پر پاکستان پہنچ گئے۔
یو اے ای صدر کے طیارے کو پاکستانی حدود میں داخل ہوتے ہی پاک فضائیہ کے لڑاکا طیاروں نے فضائی سلامی دی۔ دفتر خارجہ کے ترجمان کے مطابق صدر کے ہمراہ وزرا اور سینئر حکام پر مشتمل اعلیٰ سطح کا وفد بھی پاکستان آیا ہے۔
دورے کے دوران دوطرفہ تعلقات، خطے اور عالمی سطح کے باہمی دلچسپی کے امور پر تبادلہ خیال کیا جائے گا۔ ترجمان نے کہا کہ یہ دورہ تجارت، سرمایہ کاری، توانائی، ترقی اور علاقائی استحکام کو مزید تقویت دے گا۔
صدر یو اے ای کی آمد کے تناظر میں اسلام آباد میں تعطیل کا اعلان کیا گیا ہے اور اسلام آباد ہائی کورٹ و ڈسٹرکٹ کورٹس بھی بند رہیں گی۔
دورے کے دوران شیخ محمد بن زاید النہیان صدرِ مملکت آصف علی زرداری، وزیراعظم شہباز شریف اور دیگر اعلیٰ قیادت سے ملاقاتیں کریں گے جبکہ دونوں ممالک کے درمیان اقتصادی، تجارتی اور دفاعی تعاون کو مزید مضبوط بنانے پر بات چیت ہوگی۔