اسلام آباد میں وزارتِ خارجہ نے برطانیہ کے ڈپٹی ہیڈ آف مشن میٹ کینل کو طلب کرکے برطانیہ میں پیش آنے والے واقعے پر شدید احتجاج ریکارڈ کرایا۔
ذرائع کے مطابق برطانوی ہائی کمشنر جین میریٹ کی عدم موجودگی کے باعث برطانیہ کے قائم مقام ہائی کمشنر کو ڈیمارش جاری کیا گیا۔
ڈیمارش برطانوی شہر بریڈفورڈ میں پاکستانی قونصلیٹ کے باہر ہونے والے احتجاج کے تناظر میں دیا گیا۔ ذرائع کا کہنا ہے کہ ایک سیاسی جماعت کے آفیشل اکاؤنٹ کو برطانیہ میں مظاہرین جمع کرنے کے لیے استعمال کیا گیا، جہاں مظاہرین نے چیف آف ڈیفنس فورسز کے خلاف انتہائی اشتعال انگیز اور قابلِ اعتراض زبان استعمال کی۔
ذرائع کے مطابق احتجاج کے دوران فیلڈ مارشل کو جان سے مارنے کی دھمکیاں دی گئیں اور کار بم دھماکے میں قتل کرنے جیسے بیانات سامنے آئے۔ حکومتِ پاکستان نے ان دھمکیوں کا سخت نوٹس لیتے ہوئے زور دیا ہے کہ برطانیہ اپنی سرزمین کو پاکستان کو غیر مستحکم کرنے کے لیے استعمال نہ ہونے دے۔
پاکستان نے توقع ظاہر کی ہے کہ برطانوی حکام ایسے شرپسند عناصر کے خلاف سخت کارروائی کریں گے اور انہیں قانون کے مطابق جوابدہ ٹھہرایا جائے گا۔ ترجمان دفترِ خارجہ طاہر حسین نے بھی برطانوی قائم مقام ہیڈ آف مشن کو ڈیمارش جاری کرنے کی تصدیق کردی ہے۔